Т.САЙХАН
Соёлын гавьяат зүтгэлтэн, сэтгүүлч Ц.Балдоржийн “Хориотой” драмын жүжгийг “Орфей” театрын уран бүтээлчид шинээр тоглох гэж байна. Энэ жүжигт "Алтан дорнод монгол” ХХК-ийн үүсгэн байгуулагч Тордайн Ганболд тоглохоор болжээ. Улс төрд ч хүч үзэж явсан тэрээр энэ удаа урлагийн тайзнаас мэндчилэхээр болжээ.
Жүжигт мөс чанарын өөрчлөлт, сорилтууд хийгээд улс төр, бизнесийн бүлэглэлийн сүлэлдээн, мөнгө, албан тушаалыг үнэ цэнээ болгосон дүрүүдийн зөрчлийг сайтар өгүүлдэг. “Хориотой жүжиг” ч мөн энэ сэдвийг тойроогүй бөгөөд залуу, амьдралд хөл тавьж буй гол дүрүүдтэй гэдгээр онцлог. Харин энэ үзэгдэл өнөөдөр ч сэдэв хэвээр хэлэлцэгдэж байгаа, бүр чиг анхаарал татах хэмжээнд очиж бэхэжсэн гэдгийг уран бүтээлчид онцолж байна.
“Орфей” театрын хувьд өмнө нь Ф.Достоевскийн “Гэм зэм”, Ж.Оруэлийн “1984” зэрэг дэлхийн хэмжээний зохиолыг пост-драм хэлбэрээр тавьж, үзэгчдийн талархлыг хүлээсэн. Харин энэ удаа “Орфей” театр “Xermel” буюу жүжигчин Жижгээ, Цогтоо, Баясаа, Зоригоо нартай хамтрах шийдэлд хүрсэн нь анхаарал татав. Хошин урлагт танигдсан залуу жүжигчдийг М.Батболд найруулагч хэрхэн драмын тайзнаа “нээх” вэ, “Орфей” театр өөрөө монгол зохиолчийн бүтээлийг хэрхэн “амилуулах” вэ гэдэг ихээхэн хүлээлт үүсгээд байгаа. Тэд Ц.Балдорж сан, “Х ТҮЦ” продакшнаас зохиогчийн эрхийн зөвшөөрөл авснаар “Хориотой” жүжгийн төсөлд нэгджээ.
Эх сурвалж:www.polit.mn
