Т.САЙХАН

МАН-ын ээлжит бус бага хурал ирэх баасан гарагт болно. МАН-ын Бага хурлаар хэлэлцэх асуудлуудын талаар УИХ-ын дэд дарга Ж.Бат-Эрдэнэ байр сууриа илэрхийллээ.  Тэрээр "Ерөнхийдөө эдийн засгийн нөхцөл байдалтай холбоотой асуудлууд болон цаашид МАН-аас баримтлах бодлого, мөрийн хөтөлбөрийн хэрэгжилт гэх мэт агуулгын хүрээнд томоохон илтгэлүүд тавигдана гэсэн мэдээлэлтэй байна. Бүтцийн талаар одоохондоо ямар нэгэн мэдээлэл гараагүй байна. Гэсэн ч Засгийн газрын үйл ажиллагаатай холбоотой дүгнэлтүүд нэлээд гарах төлөвтэй байна. Мөн мөрийн хөтөлбөртэй холбоотой асуудлууд ч хэлэлцэгдэх юм. Үлдсэн хугацаанд хэрхэн мөрийн хөтөлбөрөө хэрэгжүүлэх, өнгөрсөн хугацааны биелэлтийг дүгнэх асуудлуудыг хэлэлцэнэ гэсэн мэдээлэлтэй байна. Өнөөдрийн байдлаар Засгийн газарт тодорхой ажлууд хийгдэж байгаа бөгөөд эдийн засгийн өсөлт 6 хувьд хүрсэн талаар мэдээлэл өгсөн байна. Хаврын чуулган эхэлмэгц Засгийн газрын үйл ажиллагаатай холбоотой тодорхой мэдээллүүдийг сонсоно.Мөн Монголбанк болон бусад нийгмийн шинжтэй шинэчлэлүүдийн асуудлын талаар мэдээлэл сонсох, хэрэгжүүлж буй ажлуудын талаар мэдээлэлтэй танилцана гэсэн хүлээлттэй байна" гэлээ. Түүнээс УИХ-ын дэд даргын хувьд зарим гишүүдийн ёс зүйн зөрчилтэй холбоотой асуудалд ямар байр суурьтай байгаа талаар асуухад “Ёс зүйн асуудлыг зайлшгүй ярилцах нь зүйтэй гэж бодож байна. 126 гишүүнтэй, холимог тогтолцоотой парламент бидний хувьд шинэ бүтэц. Магадгүй залуу гишүүд болон жагсаалтаар сонгогдсон гишүүд рүү бид нэлээдгүй шүүмжлэлтэй ханддаг тал бий. Гэхдээ жагсаалтаар нэр дэвшүүлсэн нь нэг талаас зөв алхам гэж үзэж байна. Эдгээр гишүүд ямар нэгэн хувийн ашиг сонирхлоор бус, намын бодлогыг даган ажиллаж, улс орны томоохон асуудалд анхаарал хандуулдаг. Энэ 126 гишүүнтэй холимог тогтолцоо цаашид улам төгөлдөржиж, жагсаалтаар улам мэргэшсэн салбарын мэргэжилтнүүдийг оруулж ирдэг тогтолцоонд шилжих ёстой” гэв.

Эх сурвалж:www.polit.mn