Б.ОЧИР

УИХ-ын дэд дарга Б.Пүрэвдоржийг “...УИХ-ын эмэгтэй гишүүдэд дарамт үзүүлсэн” гэх мэдээлэл цахим орчинд түгээд хэд хонов. Тэнд “...Б.Пүрэвдорж гишүүн ажлын байранд ёс зүйгүй увайгүй үйлдэл гаргалаа. Ямар ёс зүйтэй хүмүүс төрд ороод ирчихсэн юм бэ”, “Тэгдэг шүү, би ч хэд хэдэн удаа өртсөн” гэх зэргээр УИХ-ын эмэгтэй гишүүдийн харилцсан захидал дэлгэгдсэн.

Мэдээж, цахим орчин учраас уг асуудлыг маазруулж марзагнах байдлаар “мөлжиж” байгаад мартагнах тал руугаа орсон. Гэвч үгүй аж.

Уг мэдээлэлтэй холбоотой асуудал хууль хяналтынхны анхаарлыг татаад эхэлжээ. Эх сурвалжуудын мэдээллээр, УИХ-ын дэд дарга Б.Пүрэвдоржийг УИХ-ын гишүүн асан Б.Б, УИХ-ын гишүүн Х.Б нарт 2-3 удаагийн үйлдлээр дарамт үзүүлсэн байж болзошгүй асуудал үүссэн байна. Хамгийн гол нь, УИХ-ын дэд даргын дарамт үзүүлсэн гэх асуудал нь Төрийн ордонд болсноороо ноцтой гэж үзэж буй юм байна. Мөн энэ нь өнгөрсөн долоо хоногт УИХ-аар Гэр бүлийн тухай хуулийн төслийг хэлэлцэх үеэр нэлээд хүчтэй яригджээ. Тодруулбал, “...УИХ-ын дэд дарга Б.Пүрэвдорж Төрийн ордонд эмэгтэй гишүүдэд дээрэнгүй хандаж, дарамт үзүүлсэн нь байж болшгүй явдал” гэцгээжээ. Үүний зэрэгцээ, Б.Пүрэвдоржоос гадна төрийн өндөр албан тушаалтэй хэд хэдэн хүний хийсэн үйлдлийн талаар хөндөгдсөн байна. Уг асуудлаар удахгүй “шүгэл үлээх” тухай яригджээ. Түүнчлэн, УИХ-ын дэд дарга Б.Пүрэвдоржтой холбоотой дээрх үйлдлийн талаарх мэдээллийг Монгол Улсад суугаа гадаадын Элчин сайдын яамд, Монгол дахь Олон улсын байгууллагууд ч “сонирхоод” эхэлсэн байна. Учир нь, аливаа ардчилсан улс оронд иргэд, олон нийтийг бүхий л талаар төлөөлөх эрх парламентад байдаг. Тиймээс парламентын гишүүнд хамгийн түрүүнд ёс зүйн өндөр хариуцлага оногддог. Хэрэв парламентын гишүүн ёс бус үг, үйлдэл гаргах аваас хуулийн болоод ёс суртахууны хатуу хариуцлага тооцогддог байна. Тухайлбал, 2021 оны хавар “…Австралийн парламентын гишүүд туслахдаа дарамт үзүүлсэн” гэх дуулианд холбогдсон. Үйлдэлтэй холбоотой бичлэгч задарсан. Үүнд нь Австралийн иргэд ихэд дургүйцэж бухимдсан. Энэ талаар Ерөнхий сайд Скотт Моррисон нь “…Бичлэг цочирдом хийгээд гутамшигтай байсан” хэмээн мэдэгдсэн. Тэрээр “…Эмэгтэй гишүүдийн эрхийг хамгаалж, улс төрд татахын тулд чадах бүхнээ хийнэ” хэмээн амласан юм. Гэвч дараа нь тус улсын Парламентын ордны ажилтан Бриттани Хиггинс 2019 онд “…Дээд албан тушаалтан маань дарамт үзүүлсэн” хэмээн мэдэгдэж, Австрали Улс даяар эмэгтэйчүүдийн эрхийн төлөө, хүчирхийллийн эсрэг тайван жагсаал өрнөж байсан юм.

Эх сурвалж: “Зууны мэдээ” сонин

2025 ОНЫ АРВАНХОЁРДУГААР САРЫН 8. ДАВАА ГАРАГ. № 230 (7727)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.
Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжээрэй.