А.ЭРХЭМБИЛЭГ

“Монголын барилгачдын нэгдсэн холбоо”-ноос нийгэм, эдийн засаг цаг үеийн асуудлаар УИХ болон Засгийн газарт шаардлага хүргүүлж байгаа талаараа өнөөдөр /10.30 / “Үндэсний мэдээллийн төв”-д мэдээлэл хийлээ.

Монголын барилгачдын холбооны ерөнхийлөгч Ч.Наранбаатар “Төр, засгийн түвшинд үүсээд буй тогтворгүй байдал нь иргэдийн амьдрал, нийгэм, бизнесийн орчинд сөргөөр нөлөөлж байна. Төрийн бодлого тогтворгүй байх нь бүтээн байгуулалтын салбарт ноцтой хүндрэл үүсгэж, олон мянган ажилчдын орлого, ажлын байр, салбарын хөгжлийг зогсонги байдалд хүргэж байна” гэв.

Мөн сүүлийн таван жилийн хугацаанд барилгын салбарынхан дөрвөн сайдын нүүр үзжээ.  Энэ хэвээр үргэлжилбэл 100 мянга гаруй ажилчин, салбарын бодлого бүхэлдээ доголдох аюултай. Зөвхөн өнгөрсөн нэг жилийн хугацаанд гэхэд л гурван сайдын нүүр үзжээ.  Салбарын сайд солигдох бүрд бодлогын тогтолцоо өөрчлөгдөж, төсөв, санхүүжилтийн асуудал гацдаг байна.

Тэдний мэдээлснээр, барилгын салбарын ажилчдын цалин өнөөгийн зах зээлийн ханшаас хоёр дахин бага байгаа бөгөөд цалингийн нэмэгдлийг сүүлийн хоёр, гурван жилийн турш шаардсаар ирсэн байна. Гэсэн ч өнөөг хүртэл дорвитой шийдэл гараагүй байна.

Эмч, багш нарын адил бид жагсаал цуглаан зохион байгуулж, нэг асуудлыг нөгөөгөөр дарахыг хүсэхгүй байна. Гэсэн хэдий ч Барилгын хөгжлийн яаманд албан ёсны шаардлага хүргүүлээд байна. Төрийн тогтворгүй байдлын улмаас компаниуд тендерт шалгарч, гэрээ байгуулсан хэдий ч өнөөдрийг хүртэл санхүүжилтээ авч чадахгүй байгаа нь салбарын үйл ажиллагаанд хүндрэл үүсгэж байна” гэж онцоллоо.

Эх сурвалж:www.polit.mn