Ч.БЯМБАХАЖИД

БЗД-ийн 14 дүгээр сургуулийн дэргэд үйл ажиллагаа явуулж буй Шунхлай ШТС-тай холбоотой асуудлаар эцэг эхчүүдийн төлөөлөл мэдээлэл хийлээ. 

Энэ талаар иргэн М.Оюунхишиг “14 дүгээр сургуулийн сурагчдын эрх ашиг зөрчигдөж байна. БЗД-т шатахуун түгээх станцтай ойр ерөнхий боловсролын таван сургууль байдаг. Эдгээрээс 14 дүгээр сургууль хамгийн ойр буюу аюултай байршилд нь байгаа. Тиймээс сургуультай ойр үйл ажиллагаа явуулж байгаа “Шунхлай” ШТС-ыг нүүлгэн шилжүүлэх эсвэл үйл ажиллагааны чиглэлээ өөрчлөхийг жилийн өмнө сургуулийн захиргаа, хорооны дарга нар шаардсан. Ингээд тухайн ШТС-ыг нүүлгэн шилжүүлэх талаар хотын дарга Х.Нямбаатарын тушаал захирамж гарсан хэдий ч одоог хүртэл үйл ажиллагаагаа явуулсан хэвээр байна. Сургуулийн хүүхдүүд “Бинзен үнэртэж байна. Толгой өвдлөө” гэж хэлдэг. Гэтэл энэ асуудал шийдэгдэхгүй хэвээр байгаа бөгөөд зөвхөн сургууль ч бус ойр хавийн ААН, байгууллага, орон сууцуудыг эрсдэлд оруулж байна. Бидэнд дэлбэрэлтэд өртсөн 207 дугаар байрны гашуун сургамж бий. Бид холбогдох бүх байгууллагад санал, шаардлагаа хүргүүлсэн. Гэсэн хэдий ч ямар нэгэн шийдэлд хүрэхгүй байна” гэсэн юм. 

“Мөн 14 дүгээр сургуулийн шинээр томилогдсон захирал энэ ажил дээр анхаарал хандуулахыг хүсэж байна. Шинэ захирал биднийг огт хүлээн авч уулзаагүй. Мөн энэ асуудалтай танилцаагүй байгаа юм билээ. Тиймээс сурагчдынхаа эрх ашгийг хамгаалж, энэ асуудал дээр манлайлж ажиллахыг хүсэж байна” хэмээн эцэг эхчүүдийн төлөөлөл хэлж байлаа.  

Энэ үеэр иргэн Д.Ууганбаяр “Сургуулийн хүүхдүүдэд бинзен түлшний үнэр үнэртэж, хичээлээ хийхэд нь хүндрэл тулгарч байна. Шатахуун бол хүний төв мэдрэлийн системд гэмтэл учруулах зэргээр эрүүл мэндэд маш сөрөг нөлөөтэй. Тиймээс хуулиа дээдэлж, хүүхдүүдийн эрүүл мэндийг эрсдэлд оруулахгүйгээр “Шунхлай” ШТС-ыг нэн даруй тухайн газрыг чөлөөлөхийг хүсэж байна. Хүүхдүүд бол бидний өнөөдөр биш ирээдүй. Тиймээс хүүхдүүдээ хайрлаж, аливаа эрсдэлээс сэргийлэх нь эцэг эхчүүд бидний үүрэг” гэв.

Эх сурвалж: zms.mn