Б.БАЯР
МАН-ынхан намын даргаа сонгох Удирдах зөвлөлийн хурлаа товложээ. Ирэх бямба гаригт хийхээр болжээ. МАН-ын Удирдах зөвлөл 36 гишүүнтэй. Энэ Удирдах зөвлөлийг 2021 оны арванхоёрдугаар сард сонгож байв. Эднээс, өдгөө Т.Аюурайхан, Ц.Чулуунзагд хоёр нь хоригдож байна. Мөн, Ж.Мөнхбат Монголдоо ирэлгүй удаж байгаа юм. Түүнчлэн, СДМЗХ-ны ерөнхийлөгчөөр Б.Пүрэвдагва сонгогдсон болохоор Н.Энхболдтой солигдож, эсвэл автоматаар нэмэгдэж орсон байх учиртай. Юутай ч, энэ 30 гаруй хүн МАН-ын 31 дэх даргыг эхний байдлаар гаргаж ирнэ. Үүний даргаа 369 гишүүний бүрэлдэхүүнтэй Бага хурал нь хуралдаж намын даргаа сонгоно. Ерөнхийдөө, ирэх даваа гариг гэхэд МАН шинэ даргатай болох боломжтой.
Одоогийн байдлаар, МАН-ын даргад Ерөнхий сайд Г.Занданшатар нэр дэвших нь тодорхой байгаа юм. Удирдах зөвлөлийн хурал руу нэр нь орж таарна. Нэмээд, УИХ-ын дарга Д.Амарбаясгалан нэр дэвшихээ зарласан. Улс төрийн хүрээнд, нийтийн дунд ч энэ МАН-ын даргын төлөөх өрсөлдөөнийг хоёр эрхмийн дунд явагдахаар ярьж байна. Гэхдээ, МАН нэгэнт Хяналтын хорооныхоо чиглэлийг барьж өрсөлдөөнийг нээлттэй болговол нэр дэвшигчид нэмэгдэнэ.
Учир нь МАН-ын Хяналтын хорооноос Удирдах зөвлөл, Бага хуралдаа “…Намын даргын болон бусад дотоод сонгуульд тэгш шударгаар оролцох, өрсөлдөх, шийдвэр гаргах, сонголт хийх эрхээ бие даан хэрэгжүүлэхэд аливаа хэлбэрээр саад учруулах оролдлогыг таслан зогсооё” гэсэн чиглэлийг өгсөн.
Хэрэв, МАН-ынхан үүнд ач холбогдол өгч “…Намынхаа даргын сонгуулийг чөлөөт өрсөлдөөний зарчмаар зохион байгуулна” гэвэл нэр дэвшиж өрсөлдөх хүмүүс Г.Занданшатар, Д.Амарбаясгалан хоёроор тогтохгүй л болов уу. МАН-ын даргын сүүлийн 2-3 сонгуульд нэр нь яригдсан нэр дэвшигчид бий. Ердөө гурван сарын өмнө Л.Оюун-Эрдэнийг Ерөнхий сайдаас огцруулахад оронд нь яригдсан Я.Содбаатар, Б.Жавхлан, Ж.Энхбаяр, Г.Тэмүүлэн нар бэлэн байна. Тэгэхэд Д.Амарбаясгалангийн нэр ч яригдаж байв. Ер нь бол, Ерөнхий сайдад дэвшинэ гэдэг бол МАН-ын дарга болох чанар чансаатай л улстөрчийн зориглох алхам юм. Тэгээд бас, гуравхан сарын өмнө “…Ерөнхий сайд болно, үгүй” гээд яригдаж байсан улстөрчдийн хүсэл өнөөдөр мохоод алга болчихсон гэдэгт итгэх хүн гарахгүй л болов уу. Гэхдээ, Монголын улс төр, улс төрийн намуудын ийм мэтийн хөдөлгөөнд ороход “…Тохироо бүрдэх” нэг айхтар шаардлага байдаг. Аль ч талаас нь “орчуулж” болох тэр үйл явц хангагдвал тэгээд л намын дарга болдог. Өөр бусад том албан тушаалд ч очих боломжтой. Тиймээс, одоо яригдаж байгаагаар Г.Занданшатар, Д.Амарбаясгалан хоёрын, аль эсвэл дээрх дөрвөн эрхмийн хэд нь ч, хэн нь ч нэмэгдлээ гэхэд хэнийх нь тохироо бүрдэнэ, тэр хүн МАН-ын дарга болно. Тэр утгаараа, “…Ирэх бямба гаригт МАН-ын Удирдах зөвлөл дээр намын дарга Л.Оюун-Эрдэнэ нь хэнийг санал болгож, Удирдах зөвлөлийн гишүүд хэн, хэнийг нэр дэвшүүлэх вэ” гэдэг олны анхаарлыг татаж байна. Дээр хэлсэнчлэн, хэрвээ МАН-ынхан Хяналтын хорооныхоо “…Намын даргын болон бусад дотоод сонгуульд тэгш шударгаар оролцох, өрсөлдөх, шийдвэр гаргах, сонголт хийх эрхээ бие даан хэрэгжүүлэх” чиглэлийг дагавал Удирдах зөвлөлөөс цаашлаад Бага хурлын заалнаас ч нэр дэвшигчид тодрохыг үгүйсгэх аргагүй юм. Тэр тусмаа, намын даргад нэр нь яригдаж байгаагүй гишүүд нь ч нэр дэвшиж, АН-ын дотоод сонгууль шиг олон нэр дэвшигчийн дунд өрсөлдөөн өрнөх боломж бас бий.
Эх сурвалж: “Зууны мэдээ” сонин
2025 ОНЫ ЕСДҮГЭЭР САРЫН 19. БААСАН ГАРАГ. № 176 (7673)
Уншигч Танд “Зууны мэдээ” сонины нийтлэлтэй холбоотой санал, шүүмжлэл, хүсэлт байвал zuuniimedee@gmail.com хаягаар илгээгээрэй.