Ж.ИЧИНХОРЛОО

АНУ дахь “Монгол Авьяас Академи”-аас эх орондоо “AAU Volleyball 2026”-ийн сонгон шалгаруулалтын бүртгэлийг албан ёсоор эхлүүлж байна. Энэ талаарх хэвлэлийн бага хурлыг өчигдөр “Үндэсний мэдээллийн төв”-д хийлээ.

Энэхүү сонгон шалгаруулалт 15-17 насны  эрэгтэй, эмэгтэй тамирчдыг АНУ-ын AAU-ийн тэмцээнд өрсөлдөх боломжийг нээж буйгаараа онцлог юм. Шалгарсан тамирчид АНУ-ын Иллинойс мужид нэг сарын хугацаанд мэргэжлийн багш нарын удирдлага дор бэлтгэл хийж, олон улсын тэмцээнд оролцоно. Тодруулбал, нэг сарын хугацаанд дөрвөөс найман тэмцээнд тогтмол оролцож, туршлага хуримтлуулж байх юм.

Сонгон шалгаруулалт есдүгээр сарын 29, 30-нд зохион байгуулагдах бөгөөд сонгогдсон тамирчдыг волейболын мэргэжлийн багш нарын удирдлага дор онол, практикийн мэдлэг олгож, тусгай тоног төхөөрөмжөөр бэлтгэгдсэн талбайд бэлтгэл сургуулилалтад хамруулах аж. Шалгарсан хүүхдүүд АНУ-ын шилдэг багуудтай өрсөлдөж, олон улсын тавцанд өөрсдийгөө сорихын зэрэгцээ шилдэг коллежийн дасгалжуулагчдын хараанд өртөн тэтгэлэг авах боломжтой юм. Бүртгэлийг “Mongolian Talent Academy”-ийн албан ёсны Facebook, Instagram хуудсаар авч байна.

“Монгол Авьяас Академи”-ийн захирал Б.Хүдэрбаяр “Уг хөтөлбөр хоёр дахь жилдээ хэрэгжиж байгаа бөгөөд өнгөрсөн жил 50 гаруй сагсан бөмбөгийн тамирчдыг АНУ-д амжилттай авчран, визийг 100 хувь шийдвэрлүүлж, олон улсын тэмцээнд амжилттай оролцуулсан байна. Энэ удаа академи маань волейболын спортыг онцлон дэмжихээр шийдлээ. Хүүхэд өөрийгөө олж нээх, өөртөө итгэх, хөгжих боломжийг бүрдүүлэх болон монгол хүүхдүүдийн ирээдүйг бүтээж, хүчирхэг нэгдлийг бий болгох нь бидний нэн тэргүүний зорилго” гэв.

Хөтөлбөрийг Монголын соёл урлаг, спортын салбарын төлөөлөл дэмжиж байгаа бөгөөд Төрийн соёрхолт, продюсер Д.Отгонбаяр “Монголын олон хүүхдэд боломж нээж, залуусын ирээдүйг хамтдаа дэмжин ажиллахад бэлэн” гэдгээ илэрхийллээ.

Эх сурвалж: zms.mn