-Залуу сэтгүүлчдийг дэмжих, хэвлэл мэдээллийн хүртээмжтэй байдлыг нэмэгдүүлэх үйлсийг нь үнэлсэн байна-

Олон улсын эмэгтэй сэтгүүлчдийн сан /IWMF/ 2025 оны “Gwen Ifill”-ийн нэрэмжит шагналын эзнээр “The 19th” цахим хэвлэлийн хамтран үүсгэн байгуулагч, ахлах редактор Эррин Хэйнс /Errin Haines/ тодорсонын наймдугаар сарын 5-нд зарлалаа.

Хэйнс нь АНУ-ын улс төр, хүний эрх, жендэрийн тэгш байдлыг хөндсөн нийгмийн чухал сэдвүүдээр тууштай, бодитой мэдээлэл хүргэдэг сэтгүүлч юм. Тэрээр “The 19th” цахим хэвлэлийг үүсгэн байгуулсан бөгөөд үүнээс өмнө “The Washington Post”, “Associated Press” зэрэг нэр хүндтэй хэвлэлүүдэд ажиллаж байжээ.

"Gwen Ifill" шагналыг PBS сувгийн нэрт сэтгүүлч Гвен Ифиллийн дурсгалыг хүндэтгэн 2017 оноос хойш жил бүр олгож байгаа юм. Сэтгүүл зүйн салбарт өөрчлөлт авчирсан, мэргэжлийн  сэтгүүл зүйн өвийг нь үргэлжлүүлж буй сэтгүүлчдэд олгодог.

Эррин Хэйнс хэлэхдээ “Гвен Ифилл үнэний төлөө тууштай тэмцдэг, хэнийг ч ялгаварлаж ханддаггүй, зоригтой сэтгүүл зүйн бэлгэдэл байсан. Түүний нэрэмжит шагналыг хүртэнэ гэдэг бол миний хувьд нэр төрийн хэрэг төдийгүй цаашид энэ ажилд илүү үнэнчээр зүтгэх урам дэм юм” хэмээн онцолсон байна. Мөн “Өнөө үед олон нийт, тэр дундаа тодорхой бүлгийн иргэдийн дуу хоолой мэдээллийн орон зайд хүрэхгүй байна. Төлөөлөл бол тансаг хэрэглээ биш, ардчиллын үндэс юм” гэсэн байна.

Хэйнсийн хувьд өнгөт арьст залуу сэтгүүлчдийг дэмжих, чиглүүлэх, сэтгүүл зүйн салбарт тогтвортой ажиллах боломжоор хангах нь чиглэл рүү түлхүү ажилладаг сэтгүүлч. Тэрээр 2019 оны “Gwen Ifill” шагналт Никол Ханна-Жонстой хамтран “Frances Ellen Watkins Harper” тэтгэлэгт хөтөлбөрийг санаачлагч. Тус хөтөлбөр нь АНУ-ын өнгөт арьст иргэдэд зориулсан түүхэн их, дээд сургуулиудын (HBCUs) төгсөгчдөд бүтэн цалинтайгаар мэргэжлийн чиглэлээр дадлага хийх боломжийг олгодог. Хэйнс өөрөө уг тэтгэлэгт хөтөлбөрийн оролцогчдод ментороор ажиллаж, тэдэнд ур чадвараа хөгжүүлж, салбартаа үлдэн ажиллах  нөхцөлийг бүрдүүлдэг.

Эррин Хэйнсийн өнөөгийн уран бүтээл АНУ-ын улс төрийн хүрээнд дуу хоолой нь дутагдаж буй иргэдийн төлөөллийг нэмэгдүүлэхэд чиглэж байна. Тэрээр “The Amendment” нэртэй цахим сонин болон 2024 оны сонгуулийн үеэр ижил нэртэй подкастыг хөтөлсөн. Мөн Америкийн Өнгөт арьст сэтгүүлчдийн холбооны хэвлэлийн салбарын дэд ерөнхийлөгчөөр хоёр ч удаа сонгогдон ажиллажээ. Түүнчлэн MSNBC сувгаар жендэр болон улс төрийн асуудлаар  байр сууриа илэрхийлж оролцдог.

IWMF-ийн гүйцэтгэх захирал Элиса Лиз Муньос /Elisa Lees Muñoz/ “Эррин бол Гвен Ифиллийн мэргэжлийн хэтийн харааг бодитоор хэрэгжүүлж буй хүн. Тэрээр дуулдаж чаддаггүй дуу хоолойг хэвлэл мэдээллийн анхаарлын төвд авчирч, шинэ үеийн сэтгүүлчдийг дэмжих замаар илүү төлөөлөлтэй, тогтвортой, хүртээмжтэй хэвлэл мэдээллийн салбарыг бүтээхэд бодитоор хувь нэмэр оруулж байна” хэмээн хэлсэн байна.  

“Gwen Ifill” шагналыг 2024 оноос эхлэн UTA сан /UTA Foundation/ санхүүжүүлж байгаа гэдгийн Олон улсын эмэгтэй сэтгүүлчдийн сан мэдээлсэн байна.

Эх сурвалж: polit.mn