Б.БАЯР

Баяр наадмын амралтын өдрүүдээр нэгэн таагүй үйл явдал болсон. “Эрдэнэт үйлдвэр” ТӨҮГ-ын дэргэдэх “Найрамдлын эрдэнэс” зуслангийн тавдугаар ээлжийн амрагч хүүхдүүд хордсон юм. Хүүхдүүдээс өндөр халуурах, гэдэс гүйлгэх, толгой эргэх, бие сульдах зэрэг шинж тэмдэг илэрсэн. Энэ талаар хүүхдүүдийн ар гэрийнхэн холбогдох байгууллагууд, олон нийтэд мэдэгдсэн юм. Ингэснээр зуслангийн удирдлагууд эмнэлэгт хандаж, шаардлагатай эмчилгээг хийж эхэлсэн. Үүнээс гадна, “Найрамдлын эрдэнэс” зуслангийн орчин нөхцөл нь өнөө цаг үед баймгүй бохир, шаардлага хангахааргүй байдалтай байсныг хүүхдүүдийн эцэг, эхчүүд олон нийтийн сүлжээнд гаргаж тавьсан. Улмаар, зуслангийн үйл ажиллагааг зогсоогоод байгаа юм. Гэлээ ч, энэ асуудал олны анхаарлын төвд байсаар байна.

Өнгөрсөн бямба гаригт Ерөнхий сайд Г.Занданшатар “Эрдэнэт үйлдвэр” ТӨҮГ-ын ерөнхий захирал Г.Ёндонтой холбогдож нөхцөл байдал, хүүхдүүдийн эрүүл мэнд, эмчилгээний талаар тодруулж асуужээ. Энэ талаар Засгийн газрын Хэвлэлийн албанаас “...Хүүхэд олноор хордлогод орсон нь хариуцлагагүй байдалтай холбоотой. Учир шалтгааныг яаралтай олж тогтоон хариуцлага алдсан хүмүүст хатуу хариуцлага тооцож ажиллахыг Ерөнхий сайд даалгалаа” гэж мэдээлжээ.

Ерөнхий сайд “...Хариуцлага алдсан хүмүүст хатуу хариуцлага тооц” гэсэн. “Эрдэнэт үйлдвэр” ТӨҮГ-ын ерөнхий захирал энэ дагуу хэдэн хүн “олоод” шийтгээд асуудлыг хаана. Уг нь, Ерөнхий сайд өөрөө “...Хүн бол манай Засгийн газрын мега төсөл” гээд зарлачихсан байдаг. Гэтэл, хүүхдүүд хордсон асуудлаар “Найрамдлын эрдэнэс” зуслангийн хэдэн ажилтан халагдаад юм уу, ямар нэг байдлаар хариуцлага хүлээгээд өнгөрөхөөр байна. Тэр утгаараа, нэг л авцалдаа муутай болж харагдаад байгаа юм.

Ер нь бол, “Эрдэнэт үйлдвэр” ТӨҮГ-тай холбоотой иж бүрэн хяналт шалгалт явуулж, нөхцөл байдлыг олон нийтэд ил тодорхой болгох цаг нь нэгэнт болсон юм.

Сар хүрэхгүй хугацааны өмнө УИХ-ын гишүүн С.Ганбаатар чуулган дээр нэг ноцтой мэдэгдэл хийж байв. Тэрээр “...“Эрдэнэт үйлдвэр”-ийн энэ олон тендерийн хулгай луйврууд, энэ олон баяжмалын гэрээ нууцаас хэзээ гарах юм бэ” гэсэн. Хариуд нь “Эрдэнэт үйлдвэр” ТӨҮГ-аас “...“Эрдэнэт үйлдвэр” ТӨҮГ-аас гарч байгаа болон орж байгаа мөнгөн урсгалыг ил тод, нээлттэй болгох зорилгоор Уул уурхайн бүтээгдэхүүний биржийн тухай хууль, Засгийн газрын холбогдох тогтоол шийдвэрийг хэрэгжүүлж, “МХБ” ХK-иар зэсийн баяжмалыг биржээр худалдаж байна. Мөн “Эрдэнэт үйлдвэр” ТӨҮГ хиймэл оюунд суурилсан системийг боловсруулан, худалдан авах ажиллагааны тендерийн үнэлгээнд нэвтрүүлээд байна” гэж мэдэгдэл гаргасан.

Гэсэн ч, тус үйлдвэрийн тендер, баяжмалын гэрээтэй холбоотой элдэв хардлага,эргэлзээ байсаар байгаа бөгөөд энэ нь сүүлийн жилүүдэд улам нэмэгдэх болсон. Мөн, Ерөнхий сайдын яриад байгаа “...ашиггүй, шударга бус, сахилга батгүй олон асуудал” тус үйлдвэрээс илрэх магадлал өндөртэй. Гэтэл, “Эрдэнэт үйлдвэр” ТӨҮГ-аас төсөвт төвлөрүүлсэн орлого, татварт төлсөн мөнгөнд дулдуйдаж, PR-дах байдлаар явж ирсэн нь нууц биш юм. Тиймээс, “Эрдэнэт үйлдвэр” ТӨҮГ-ын элдэв нууцуудыг ил болгож, Г.Ёндон захирал ч үнэнийг ярих шаардлага үүссэн. Гэхдээ үүнийг хэн, хэзээ хэрэгжүүлэх бол?

Эх сурвалж: “Зууны мэдээ” сонин

2025 ОНЫ ДОЛООДУГААР САРЫН 21. ДАВАА ГАРАГ. № 130, 131 (7627, 7628)