Ч.БЯМБАХАЖИД

Гэрэл зургийг Р.Оюун

ЭТТ ХК-ийн туслан гүйцэтгэгч Хятадын 100 хувийн хөрөнгө оруулалттай “ТТЖВСиӨү” ХХК-ийн ажилчид хүний эрх зөрчиж, цалин хөлсөө хөдөлмөрийн хуулийн дагуу бодохгүй байгаа асуудлын талаар мэдээлэл хийж, тэмцлийн хурц хэлбэрт шилжин нойтон өлсгөлөн зарлахаа мэдэгдлээ.

Энэ талаар “ТТЖВСиӨү” ХХК-ийн Уулын дампны оператор Б.Тамир “Бид 2025 оны нэгдүгээр сараас хойш хөдөлмөрийн маргааны асуудлаар компанидаа шаардлага тавьж байна. Гэхдээ одоо хүртэл хариу аваагүй. Бид цалингаа нэмүүлье гээгүй. Ердөө хуульд заасан, олгох ёстой цалинг л бидэнд өгөөч гэж шаардаж буй. Компанидаа шаардлага тавихаар асуудлыг дээрдүүлэхгүй, улам л дордуулдаг.  Монголын уул уурхай гаднын хөрөнгө оруулалт нэрийн дор Хятадын халаасанд орчихсон. Засаг төр арга хэмжээ авч өгөөч.  Бид компанитайгаа хэлэлцээр хийж, ажлаа үргэлжлүүлэн хийхэд бэлэн байна. Дэлхийн жишгийн цалин хүсээгүй. Хөдөлмөрийн тухай хуульд заасан цалинг л бодоод өгчих. Хөдөлмөрөө үнэн шударгаар үнэлүүлмээр байна. Цалин бодох системийг бүгд мэдэж байж, өмнөх жилүүдийнхээс ч цалинг багасгаж байна. Сар бүр ирдэг байсан цалингийн задаргаа энэ оны нэгдүгээр сараас эхлэн ирэхээ больсон. Одоо байгаа ажилчдынхаа цалинг ч зохих хэмжээгээр олгож чадахгүй байж, шинэ ажилчид авна гээд зар тавьж байна” гэв.

“ТТЖВСиӨү” ХХК-ийн Уулын оператор А.Очирхүү “Бид гаргасан мэдэгдэлд өдийг хүртэл дорвитой арга хэмжээ огт авсангүй. Яг л адилхан шаардах бичиг хүргүүлж, ямар ч гарын үсэггүй албан бус бичиг баримтыг бидэн рүү явуулж байна. Үүнийг бид ажлын байрны дарамт гэж харж байгаа. Монгол улсын хөдөлмөрийн тухай хуулийн дагуу цалингаа авмаар байна. Нийт ажилчдын эрх ашиг хөндөгдөж байгаа учраас бид нойтон өлсгөлөн зарлаж байна.

Мөн холбогдох яам, албан тушаалтнуудад энэ асуудлыг шийдэж өгөхийг хүсэж таван шаардлага тавьсан. Үүнд, нэгдүгээрт, Монгол Улсын хөдөлмөрийн тухай хуулийн дагуу цалин бодуулах. Хоёрдугаарт, Ээлжийн амралтын мөнгөн олговорыг хоёр амралтын хоорондох дунджаар12 цагаар бодох. Гуравдугаарт, нийт ажилчдад хоёрдугаар сараас хойш дутуу бодогдсон цалинг нөхөж олгох. Дөрөвдүгээрт, зургаадугаар сарын 6-наас одоог хүртэл түр зогсолт хийсэн ажилчдад цалин хөлсийг нөхөж олгох. Тавдугаарт, цаашид нийт ажилчдад ажлын байрны дарамт, шахалт үзүүлэхгүй байх, ажлаас халахгүй байх гэсэн шаардлагууд л байгаа. Гэвч бидэнд ямар ч дорвотой хариу өгөхгүй байсаар байна” гэлээ.

Эх сурвалж: zms.mn