Б.Баяр

Ер нь, “…Нүүрсний хулгай байсан уу, үгүй юу” гэдэг эргэлзээ одоог хүртэл тайлагдаагүй байна. Учир нь, нүүрсний хулгайтай холбоотой буруутан одоог хүртэл шүүхээр эцэслэн тогтоогдоогүй байгаа юм. 
Уг нь, 2022 оны арванхоёрдугаар сарын ид хүйтнээр улс даяараа нүүрсний хулгайг эсэргүүцэж, Сүхбаатарын талбай дээр жагсаж байлаа. Тухайн үед нүүрсний хулгайг мөрдөх байгууллагуудын ажлын хэсэг “…Нүүрс худалдах, худалдан авах гэрээгээр бусдад давуу байдал олгосон эсэх”, “…“Эрдэнэс Тавантолгой” ХК-ийн худалдан авах ажиллагаа буюу тендер дээр бусдад давуу байдал олгосон эсэх”, “…Оффтейк гэрээ байгуулахдаа хууль тогтоомж зөрчсөн эсэх”, “…Тээвэрлэлтийн үйл ажиллагаа эрхлэх компанийг сонгон шалгаруулахдаа давуу байдал үүсгэсэн эсэх”, “…Тээвэрлэх явцдаа жингийн зөрүүтэй ачсан эсэх, хоосон гэх мэдүүлгээр буюу буюу хулгайн тээвэр хийсэн эсэх” гэсэн 4-5 төрлөөр мөрдөн шалгаж эхэлсэн.
Нүүрсний хулгайд олон улстөрч, хэдэн зуун төрийн албан тушаалтан, нэр бүхий хэд хэдэн компанийнхан холбогдож, ажлын хэсгийнхэн 70 гаруй эрүүгийн хэрэг үүсгэж шалгасан. Улмаар хэргүүдийг шүүхэд шилжүүлсэн байдаг. Харин шүүхээс тэдгээр хэргийг тодорхойгүй “хариу”-тай дуусгасан.
Улмаар, УИХ-аар нүүрсний сонсголыг хийсэн. “…Энэ хулгайн эцсийг эндээс үзэх нь” гэж олон нийт харсан. Гэвч, нүүрсний хулгайн хамгийн чухалд тооцогдоод байгаа Ухаахудаг, бас оффтейк гэрээний асуудал сонсголоос бараг л “хасагдсан” байдалтай яригдасхийгээд өнгөрсөн. 
Гэхдээ, энэ нь удахгүй нэхэн сөхөгдөж магадгүй юм байна. Учир нь, улс төр буцалж буйгийн учир шалтгаан ч эдгээртэй тодорхой хэмжээнд холбоотой бололтой. Улс төрийн хүрээнд, улстөрчдийн ам дамжин “…Тухайн үед сонсголоор хамаарал бүхий болсон этгээдүүд хамтдаа Тэрэлжид амарсан. Дахиад Хөвсгөл рүү нисэж, хаус хуваарилаад, тэгж явахдаа нисдэг тэрэг унагаж, түүнээс нь болж ноцтой асуудал гарсан” хэмээн яригдаж байна. Хэрэв, энэ яриа үнэн бол удахгүй “…Нүүрсний сонсголоос Ухаахудаг, оффтейк гэрээ хоёр яагаад хасагдсан бэ” гээд нэхэн сөхөх юм байна. 

Эх сурвалж: "Зууны мэдээ" сонин

2025 ОНЫ ЗУРГААДУГААР САРЫН 26. ПҮРЭВ ГАРАГ. № 119 (7616)