Б.ГАРЬД

Ер нь бол, УИХ дээр болдог сонсголд анхаарал тавих хэрэгтэй цаг ирсэн шиг байна. Өмнө нь, 2020-2024 оны УИХ-ын үед сонсголын оргил үе байлаа. Тэр үед, Хөгжлийн банкны, нүүрсний, эмийн гээд олон нийтийн анхаарал татсан, басхүү нийгмийг өвтгөсөн сэдвүүдээр том том сонсгол зохион байгуулж байв. Гэтэл, эргээд харахад зарим сонсгол нь улс төрийн байлдааны “сэлэм”-ний үүрэг гүйцэтгээд өнгөрсөн байх жишээтэй. Тэр нь өнөөдөр барим тавим уншигдаж байна. Мөн, ерөнхийдөө үр дүн муутай. Тэрүүхэн үедээ л шуугиад өнгөрдөг.  Хууль хяналтын байгууллагууд ч барьж аваад ажил хэрэг болгосон нь ховор байх юм. Тэгвэл, эхэнд хэлсэнчлэн УИХ-ын сонсголоор улс төрийн “байлдаан” хийгээд байх шинжтэй болжээ. Саяхан даа, “…АН-ынхан олны анхаарал татсан, мөн улс төр, бизнес холилдож, ардаа асар их мөнгөний асуудал үүсгэсэн байж болзошгүй зарим сэдвээр УИХ-ын нээлттэй сонсгол зохион байгуулахаар ярьцгаасан” гэх мэдээлэл түгсэн. Түүгээр, АН-ынхан “Бодь интернэшнл”-ийн оффтейк гэрээ, “Тэрбум мод” үндэсний хөтөлбөр, Газрын тос боловсруулах үйлдвэр, АН-ын алдагдсан тамганы асуудал зэрэг дөрвөн асуудлаар ийм сонсгол хийх гэж байгаа тухай мэдээлэл цацагдсан. Тэр байтугай, дээрх сэдвүүдээр сонсгол хийхээр нэр бүхий гишүүдийн бланк бүлгийнх нь гишүүдийг “хэсээд” эхэлсэн тухай мэдээлсэн.

Эдгээр дээр нэмээд, УИХ-ын дарга Д.Амарбаясгалан өнгөрсөн амралтын өдрүүдээр Ховд аймгийн Мянгад суманд очоод “…Халзан бүрэгтэйн асуудлаар УИХ-ын сонсгол хийнэ. Тэндээс тодорхой шийдвэр гарна” гээд зарлачихлаа. Мөн үүнтэй зэрэгцээд УИХ-ын нэр бүхий гишүүд УИХ-ын 2024 оны сонгуулийн өмнөхөн хэрэгжээд эхэлсэн “Шинэ хоршоо хөдөлгөөн”-ий хүрээнд хэрэгжүүлэх таван их наядын “Шинэ хоршоо-Чинээлэг малчин” арга хэмжээний хэрэгжилтийн талаар УИХ-ын сонсгол зохион байгуулахаар болсон тухай мэдээлэл ирлээ. Тиймээс, улс төрийн хүрээнийхэн “…Улстөрчид цаашдаа УИХ-ын сонсголоор байлдаад байх нь” гэлцээд эхэллээ. Үнэхээр ч, сонсгол хийхээр зэхэж буй сэдвүүдийг харахад тэгж харагдаж байна.

Эх сурвалж: “Зууны мэдээ” сонин

2025 ОНЫ ЗУРГААДУГААР САРЫН 23. ДАВАА ГАРАГ. № 116 (7613)