Э.ОТГОН-ЭРДЭНЭ
“Эрдэнэс Тавантолгой” ХК нь усны гэрээ хийгээгүй, усны дүгнэлт гаргуулахгүйгээр ус ашигласан, аюултай хог хаягдлыг тусгаарлалгүй хууль зөрчиж, хүрээлэн буй орчныг бохирдуулсан, зөвшөөрөлгүйгээр химийн бодис ашигласан зэрэг асуудлаар экологич Д.Туяа ерөнхийлөгч У.Хүрэлсүх, ерөнхий сайд Г.Занданшатар нарт хандаж хэвлэлийн бага хурал хийлээ. Хурлын үеэр тэрээр “Уул уурхайн компаниуд тухайн жилд ус ашиглах үнийн дүн буюу усны дүгнэлт гаргуулах шаардлагатай байдаг. Гэвч “Эрдэнэс Тавантолгой” ХК нь 2025 онд усны дүгнэлт, усны гэрээ хийхгүйгээр зургаан сар ус ашигласан. Энэ нь байгаль орчны эсрэг гэмт хэргийн шинжтэй асуудал гэж үзэн мэргэжлийн байгууллагад нь гомдол гаргасан.
Мөн “Эрдэнэс Тавантолгой” ХК нь химийн бодис ашиглах зөвшөөрөлгүйгээр үйл ажиллагаа явуулдаг. Үүнээс үүдэн ажилчид, хүрээлэн буй орчин, мал амьтан хордох аюул үүсэж байна. Энэ асуудалтай холбогдуулан “Эрдэнэс Тавантолгой” ХК-д химийн бодис ашиглах, агуулах стандарт байхгүй гэдгийг баримтжуулж, БОАЖЯ-д шаардлага хүргүүлсэн.
Мөн “Эрдэнэс Тавантолгой” ХК нь аюултай хог хаягдлаа энгийн хог хаягдалтай нэг дор байршуулсан байж магадгүй байдал ажиглагдсан. Тендер зарлаж, мэргэжлийн зөвшөөрлөө авсан компани аюултай хог хаягдлыг тээвэрлэх, хадгалах, дарах асуудлыг хариуцдаг. БОАЖЯ-ны мэдээллийн сан руу ороход “Эрдэнэс Тавантолгой” ХК нь аюултай хог хаягдлыг хариуцсан” гэсэн бичиг баримт, тайлан гарч ирээгүй. Тиймээс Монгол Улсад хүчин төгөлдөр үйлчилж байгаа хуулиудыг сахин биелүүлээгүй гэж үзэж байна. Үүнээс болоод хүний амь нас, эрүүл мэнд, хүрээлэн буй орчинд их хэмжээний хохирол учруулсан байж болзошгүй учраас ерөнхий Сайд Г.Занданшатарт мэдэгдэл хүргүүлж байна” гэлээ.
Харин ерөнхийлөгч У.Хүрэлсүхэд дараах шаардлагыг хүргүүлсэн юм. “Эрдэнэс Тавантолгой ХК-ийн талбайд 31 тонн хэмжээ бүхий Хүннүгийн үе, хүрэл зэвсгийн үеийн соёлын үл хөдлөх дурсгал байна. 2022 онд “Эрдэнэс Тавантолгой” ХК-ийн талбайд мэргэжлийн судлаачид судалгаа хийж, ашигт малтмалын газар руу “Хүннүгийн үе, хүрэл зэвсгийн үеийн соёлын дурсгалт газрыг хэсэгчлэн хүчингүй болгох” тухай бичиг хүргүүлсэн. Гэтэл сүүлийн дөрвөн жилийн хугацаанд “Эрдэнэс таван толгой” ХК-ий уул уурхайн ажил нь тус соёлын үл хөдлөх дурсгалыг сүйтгэх хэмжээнд байна. Тиймээс энэ асуудалд арга хэмжээ авч өгөх хүсэлтийг хэвлэлийн хурлаар дамжуулан хүргэсэн юм.
Эх сурвалж: zms.mn