Б.Гарьд

Юм учиртай, сум зангитай. Баялгийн шалтгаантай, бөгжний шалтагтай засгийг өөрчлөх том акц үргэлжилж байна. Өмнөх 30-аад жилд дураараа дургиж, Монголын төрд байсан бүгдийг, Монголын ард нийтэд байх бүгдийг хүүдийлсэн хэсэг бүлэгхэн хүний мөнгө, технологи хоёрын хүчээр үйлдэж буй арга ажиллагаа юм л даа. “…Цаана нь Баялгийн сан байгаа шүү” гэж мянга хэлээд сонсох, сонирхох хүн ховор байх шиг байна. За, энэ ч дүүрч. Дахиад хэдэн жилийн дараа, нийтээрээ ухаарч байж, Ухаахудагаас эхлээд хамаг байдгаа ухуулж ашиглуулсны дараа ойлгох биз ээ.

Өнгөрсөн 4-5 жилд тэдний хамаг муу муухайг онгичиж илчилснийхээ шанг л Ерөнхий сайд хүртэж байгаа юм. Түүн рүү бүх хулгайч нийлээд хамаг хүч, хөрөнгөө цацаж байна. Тэдний хясагдсан хүсэл шуналыг гүйцээхэд нэр бүхий улстөрчид өгсөн чиг үүргийнх нь дагуу өндөр ачаалалтай ажиллаж байна. ТЭр тусмаа УИХ-ын гишүүд олноороо оролцож байна. Хэд нь сайд болно. Хэсэг нь ашиг сонирхлоо гүйцэлдүүлнэ. Сүүлдээ, эвгүйдүү мэдээлэл нэр устайгаа яригдаад уналаа. “…УИХ-ын гишүүн Д.Бум-Очир жагсаалыг зохион байгуулж, УИХ-ын гишүүн Д.Батлут Эрдэнэтээс хүмүүс зөөж дэм болж байна” гэв. Энэ үнэн, эсвэл худал эсэх дээр эрхэм гишүүд өөрсдөө тайлбар өгөх нь зүйтэй юм. Ер нь бол, энэ бүхний эцэст “…Жоомоо алах гээд байшингаа шатаав” гэдэг шиг хүн бүрийн халаасыг хараахан түнтийлгэж амжаагүй ч сэхэл авах гэрэл гэгээ гялайж байсан эдийн засаг унтрах шинжээ олов. Нийгмийн сэтгэл зүй тогтворгүй болж, улс төр ороо бусгаа болчихлоо.

Эх сурвалж: polit.mn