Б.ОЮУНЖАРГАЛ
Өнгөрсөн дөрөвдүгээр сарын 28-ний өдөр Монголын Барилгачдын Нэгдсэн Холбоо, Сэлбэ дэд төвийн барилга орон сууцны тендерт 15 хятад компани орохоор болсныг эсэргүүцэн Монгол Улсын Ерөнхийлөгч, Засгийн газарт болон эрх бүхий 14 албан тушаалтанд шаардлага хүргүүлжээ. Гэвч зөвхөн гурван субьектээс хариу ирсэн талаар мэдээллээ.
МБНХ-ны дэд ерөнхийлөгч Ч.Наранбаатар “Сэлбийн байгууламжийг Монгол барилгачид хийж чадна гэдэгтээ итгэж байгаа. Бид ирээдүйдээ эзэн нь баймаар байна. Дараагийн үеийн барилгын бизнес эрхлэгчиддээ орон зай үлдээмээр байна. Хятадууд биш Монгол барилгачин залуучууддаа орон зайг үлдээхийн тулд бид ингэж явж байна” хэмээсэн юм.
Мөн Сэлбэ дэд төвийн тендерийн нэг, хоёр дугаар багцийн гэрээг цуцлуулах, Сэлбэ дэд төвийн тендерийн гурав, дөрөвдүгээр багцийн тендерт гадаадийн компани оролцох нөхцөлийг хаах, Сэлбэ дэд төвийн тендерийн гурав, дөрөвдүгээр багцийн тендерийн бичиг баримтад заасан өндөр шалгууруудыг мэргэжлийн албуудтай болон барилгачидтай зөвшилцөн бууруулж, Монгол аж ахуй нэгжүүдийн оролцох боломжийг төрийн бодлогоор дэмжих гэсэн гурван шаардлагийг хүргүүлж байгаа аж. Иймд 48 цагийн дотор хариу өгөөгүй тохиолдолд тэмцлийн хурц хэлбэрт шилжин жагсаал, эсэргүүцэл, өлсгөлөн зарлах гэж буйгаа хэллээ.
Эх сурвалж: zms.mn