С.УРТНАСАН

Монголын барилгачдын нэгдсэн холбооноос Барилгачдын VII их хурал хийх талаар “Үндэсний мэдээллийн төв”-д мэдээлэл хийлээ.

Тус хурлаар барилгын салбарт тулгамдаж буй олон асуудлуудыг барилгачдын VII их хурлаар хэлэлцэж шийдвэрлэнэ гэв.  Энэ талаар МНБ холбооны дэд ерөнхийлөгч Ч.Наранбаатар: “Энэхүү хэвлэлийн хурлаар дамжуулан 2025 оны тавдугаар сарын 19-нд Монголын барилгачдын их хурал, Барилгын салбарт шинэ 100 жил гэх нэртэй их хурлаа хийхээ зарлаж байна. Монголын барилгачдын нэгдсэн холбоо 1990 оны зургаадугаар сарын 23-нд анхны их хурлаа хийж үүсгэн байгуулагдсан монголын ардчилалтай зэрэгцэж төрсөн байгууллага. 2021 онд болох байсан VII их хурал цар тахлын улмаас хурал хойшлогдсон. Тус хуралд барилгын салбарын бүх төлөөлөл хамрагдан оролцдог уламжлалтай. Өмнөх хурлууд 600-800 гаруй хүний ирцтэйгээр хийгдэж байсан. Одоогийн байдлаар 21 аймаг, есөн дүүргийн хэмжээнд 620-иод барилгын салбарын төлөөллийнхний бүртгэлийг хийсэн байна. Мөн монголын барилгачдын нэгдсэн холбоотой хамран ажилладаг 12 төрийн бус байгууллага хурлын урилгыг тарааж ажиллана.

VII их хурлыг хууль эрх зүйн орчны шинэчлэл, эдийн засгийн шинэчлэл, шинэчлэлийн шинэ зуун гэсэн гурван агуулга дээр тулгуурлаж хийнэ. 2016 оноос хойш барилгын салбарын хуулиуд шинэчлэгдээд явж байгаа энэ үед монголын барилгачид, төрийн бус байгууллага дүрэм журмаа алдаагүй биелүүлж өөрсдийн эрх ашгийг хамгаалах, хууль эрх зүйн орчноо таатай болгох тал дээр анхаарч ажиллана. Мөн бид зах зээлийн эдийн засагт шилжээд 35 жил болсон ч барилгын төсөв өртөг коммунизмын үеийнхээр явсаар байна. Тендэрийн буюу цүнхний компаниудыг барилгын зах зээлээс яаж гаргах вэ, барилгын салбарын нэр хүндийг яаж өсгөх вэ зэрэг асуудлуудыг хурлаар хэлэлцэнэ” гэв.

Эх сурвалж: zms.mn