З.БАТЦЭЦЭГ

Америкийн эрх баригчид АНУ-ын 35 дахь ерөнхийлөгч Жон Кеннедигийн дүү Роберт Кеннедигийн амийг хөнөөсөнтэй холбоотой 60 мянган хуудас баримт бичгийг нууцын зэрэглэлээс гаргажээ. Материалуудыг АНУ-ын Үндэсний архивын сайтад байршуулсан байна. Үүнээс өмнө 2025 оны тавдугаар сарын 8-ны пүрэв гарагт ТАСС мэдээлснээр энэ хэргийн талаар ердөө 10 мянган баримт бичиг нийтлэгдсэн байсан юм.

АНУ-ын Үндэсний тагнуулын газрын захирал Тулси Габбард "60,000 гаруй баримт бичгийг олж, нууцын зэрэглэлээс гаргаж, олон нийтэд хүртээмжтэй болгох зорилгоор цахимжуулсан. Эдгээр материалыг нийтэлсэн нь үнэнийг олж тогтоох, ил тод байдлыг дээд зэргээр хангахад чухал алхам боллоо" гэж олон нийтийн сүлжээгээр дамжуулан бичжээ.

Холбооны хуулийн дагуу гаргасан ерөнхийлөгч Жон Кеннедигийн амь насыг хөнөөсөн тухай материалуудаас ялгаатай нь Роберт Кеннедигийн амийг хөнөөсөн тухай баримтууд нь холбооны Засгийн газрын янз бүрийн архивт хадгалагдаж байсан бөгөөд өнөөг хүртэл олон нийтэд ил болоогүй байв. Нууцлагдаагүй баримт бичигт Холбооны мөрдөх товчооны удирдлагууд, хууль сахиулах байгууллагын санамж бичиг, мөрдөн байцаалтын явц болон бусад үнэ цэнтэй мэдээлэл багтана.

АНУ-ын Ерөнхийлөгч Дональд Трамп Жон, Роберт Кеннеди, Нобелийн энх тайвны шагналт Мартин Лютер Кинг нарын аллагатай холбоотой нууц материалыг задруулах тушаалд гарын үсэг зурсны дараа уг баримт бичгүүдийг нийтлэх боломжтой болсон. Одоогийн байдлаар архивын 5 сая орчим хуудасны 99 хувь нь нууцын зэрэглэлээс гарсан байна.

Сенатор Роберт Кеннеди 1968 оны зургадугаар сарын 5-нд Калифорни дахь Ардчилсан намын анхан шатны сонгуульд ялалт байгуулсны дараахан алагдсан юм. Энэ хэргийнхээ төлөө Палестин Сирхан Сирханыг бүх насаар нь хорих ялаар шийтгэсэн бөгөөд тэр одоо ч ял эдэлж байгаа юм. Ял шийтгүүлсэн эр өдгөө 81 настай.

Эх сурвалж: polit.mn