Гадаад харилцааны яамнаас санаачлан “Олон улсын нийтийн эрх зүйн хэм хэмжээг үндэсний түвшинд хэрэглэхэд тулгарч буй бэрхшээлүүд, тэдгээрийг даван туулах арга зам” сэдэвт хэлэлцүүлэг зохион байгууллаа. Хэлэлцүүлэг энэ сарын 16-нд тус яамны Зөвшилцөл танхимд болов.

Үндэсний хэмжээнд олон улсын нийтийн эрх зүйн тухай ойлголтын түвшинг тодорхойлох, олон улсын олон талт гэрээг төр, захиргаа, хууль сахиулах байгууллагад болон шүүхэд хэрэглэхэд учирч буй хүндрэл бэрхшээлийг тодорхойлох, даван туулах арга замыг хэлэлцэх, олон улсын хууль, шүүхийн байгууллагуудтай хамтран ажиллах боломж, тэдгээр байгууллагуудын зүгээс тавьсан хүсэлтийг үндэсний хэмжээнд хэрэгжүүлэх асуудал, хамтарсан сургалт, судалгааны ажил эрхлэх, хуульчдыг сургах, давтан сургах боломжийн талаар тус тус хөндсөн уг арга хэмжээнд УИХ, Үндсэн хуулийн цэц, Улсын дээд шүүх, Ерөнхийлөгчийн тамгын газар, УЕПГ, ХЗДХЯ, БХЯ, ЦЕГ, ШШГЕГ, ХХЕГ, Хууль зүйн үндэсний хүрээлэн, Монголын хуульчдын холбоо, МУИС-ийн Хууль Зүйн Сургууль, ДХИС, Шихихутуг их сургууль, Их засаг их сургууль, Отгонтэнгэр их сургууль зэрэг байгууллагуудын 40 гаруй төлөөлөл оролцов гэж ГХЯ-наас мэдээлэв.

Эх сурвалж: Polit.mn