Б.БАЯР

УИХ-ын гишүүн Б.Найдалаа, Боловсролын сайд П.Наранбаяр хоёрын зодоон яахын аргагүй Төрийн ордны өнгөрсөн долоо хоногийн “дуулиан”-аар нэрлэгдэж байна. Тэд “…Санамсаргүй явдал болсон”, “…Би бол зодолдоогүй” гэж, намын дарга нь “…Манай хоёр эхнэртээ ч зодуулах хүмүүс” гэх мэтээр маазруулаад өнгөрөх шиг боллоо. Гэхдээ энэ хоёр хүн хоёулаа ХҮН намаас УИХ-д орсон. Цаашлаад, нэг нь Засгийн газарт сайд болсон. Тиймээс төрийн түшээд гэдэг утгаар нь олон нийт “сонирхож” таарна. Мөн мань хоёрын зодооны асуудлаар УИХ, Засгийн газар ч анхаарах л шаардлагатай болов
уу даа. Учир нь ХҮН намын хоёр “хүн томилох”-оос болж зодолдсон гэсэн мэдээлэл байна. Б.Найдалаа гишүүн П.Наранбаяр сайдад хүн томилуулах хүсэлт тавьж, тэр нь биелээгүйтэй холбоотой бололтой. 
Ер нь бол сүүлийн үед томилгоотой холбоотой элдэв зүйл яригдах болсон. Засагт хамтарсан намууд авсан салбар намын томилгоо, хувийн томилгоо хийгээд байгаа нь нууц биш. Тэр дундаа боловсролын салбарт ихээхэн дуулдаад байгаа юм. Зарим албан тушаал, тодруулбал сургуулийн захирлуудыг хуйгаар нь өөрчлөх талаар ч эрхэм сайд санаачилга гаргаад үзсэн байдаг. Мөн өөрийн ойр дотнынхныг хайр найргүй томилж байгаа тухай салбарынхан нь найгүй ярьж байна. Жишээ нь, “…Сайд бага ангийнхаа багшийг лицейгийн захирлаар томилчихлоо” гээд л эхэлнэ.

Эх сурвалж: polit.mn