Б.ГАРЬД

Ногоон автобусны хэргийн шүүх хурал өнгөрсөн долоо хоногт эхэлсэн. Үргэлжилж байна. Автобус худалдаж авах ажиллагаа авалт гэмт хэрэг болж хувирсан гол үндэслэл нь худалдан авалтыг нууцад оруулсантай холбогддог.

Тэгвэл модон могой жилийн цагаан сарын шинийн 1-нд Чингис хааны алтан хөшөөг “Чингис хааны музей”-д залж, Их хааны өргөө, Их Эзэн хааны алтан хөшөө, Шүтээн их цагаан туг, Төрийн Хасбуу тамгын нээлтийн ёслолыг хийсэн юм. Уг хөшөөг Италийн Флоренци хотын “Art’u di Gaetano Salmista” хүрлийн үйлдвэрт цутгажээ.

Харин хөшөөний худалдан авалт, уг хөшөөг бүтээсэн үнэ хөлс нууцлагдмал байна. Ер нь бол, уг хөшөөг анх төсөв хөрөнгийг нь шийдэж, гадаадад захиалгаар хийлгэсэн 2022 оноос хойш л хөрөнгө зардлыг нь нуусаар байгаа гэхэд болно.

“Чингис хааны музей”-нхэн “…Энэ талаар Монголбанкныхнаас тодруулах хэрэгтэй” гэдэг. Харин Монголбанкныхан “…Мэдээлэл өгөх боломжгүй” гэчихдэг.

Тиймээс олон нийт “…Чингис хааны хөшөөг бүтээсэн нь зөв. Харин гарсан зардлыг нуугаад байгаа нь эргэлзээтэй” гээд байгаа юм. Өөрөөр хэлбэл, “…Чингис хааны алтан хөшөөний зардалтай холбоотой асуудал ногоон автобус шиг болох вий” гэдэг болгоомжлол бий болоод байна.

Гэхдээ “…Монголбанкнаас ес орчим тэрбум төгрөг гаргасан” гэх зарим эх сурвалжийн мэдээлэл байна. 

Түүнчлэн энэхүү “Их хааны өргөө, Их Эзэн хааны алтан хөшөө, Шүтээн их цагаан туг, Төрийн Хасбуу тамгын нээлтийн ёслол” нь ч чамгүй зардлаар бүтжээ. Тухайлбал, “Хүрэл соёмб” ХХК нь Хүндэтгэлийн өргөөний үзүүллэг дэглэлт, тохижилтын ажлыг 2 296 287 885 төгрөгөөр, “Саунд ов Монголиа” ХХК тус арга хэмжээний шаардлагатай тоног төхөөрөмжийн түрээс, тохижилтыг 19 750 000 төгрөгөөр, “Мастер төмрийн уран дархан” ХХК уг ёслолын арга хэмжээний шалны хивсэнцэр, нээлттэй холбоотой хөшөөг бүтээх даавуун чимэглэлийг 16 500 000 төгрөгөөр, “Хаан палас” ХХК ёслолын хүлээн авалтыг 13 994 400 төгрөгөөр, “Аравсай” ХХК нь Шүтээн их цагаан туг бүтээх ажлын хүрээнд Шүншиг байрлах хоёр хайрцгийг 18 100 000 төгрөгөөр, “Урсус энд сирус” ХХК нь Шүтээн их цагаан туг бүтээх ажлын хүрээнд төмөр хийцлэлийг 19 500 000 төгрөгөөр, “Дулаан хан трейд” ХХК нь Шүтээн их цагаан туг бүтээх ажлын хүрээнд төмөр хийцлэл, метал цутгуурыг 19 650 000 төгрөгөөр, “Хантайн цоохор өв” ХХК нь Шүтээн их цагаан туг бүтээх ажлын хүрээнд төмөр хийцлэл, метал цутгуурыг 19 250 000 төгрөгөөр, “Хас гоёл” ХХК нь мөнгөн том бумба, мөнгөн жижиг бумба, том жижиг бумбаны хоёр хайрцаг сэлтийг 13 662 000 төгрөгөөр хийж гүйцэтгэжээ.

Эх сурвалж: “Зууны мэдээ” сонин

2025 ОНЫ ГУРАВДУГААР САРЫН 10. ДАВАА ГАРАГ. № 43 (7539)