П.ЖАРГАЛ

“GUYS” хамтлагийн уран бүтээлчид өнөөдөр “Үндэсний мэдээллийн төв”-д гурван зүйлийн талаар мэдэгдэл хийлээ.

Монголын хамгийн олон сонсогч, хит дуунуудтай хамтлагийн нэг “GUYS” нь найман жилийн дараа дахин бие даасан бүрэн хэмжээний тоглолтоо хийнэ. Тэд энэ оны зургаадугаар сард “Good luck” шоу тоглолтоо хийхээр бэлтгэл ажилдаа оржээ.

“GUYS” хамтлагийн дууны клипийг богино хэмжээний кино шиг гэж ярих нь бий. Тус хамтлагийн дуучин А.Төгсбаяр аяыг зохиож, Д.Лхагва үгийг нь бичсэн “Эр хүн” шинэхэн уран бүтээлээ өлгийдөн авчээ. Тэгвэл энэхүү дуунд зориулсан клипний санааны уралдааныг зарлаж байгаа мэдэгдлээ. Эр хүний мөн чанарыг нотолж харуулсан үг, үйлдлийн талаарх өөрийн мэдэх, бусдаас сонссон эсвэл амьдралд чинь тохиолдсон, дурсаж явдаг, сэтгэлд үлдсэн бодит үйл явдал, амьдралын жишээг бичиж илгээх юм. Зохиол биш санааны уралдаан гэдгээрээ онцлог ажээ. Нийт 10 сая төгрөгийн шагналын сантай бөгөөд бүх хүнд нээлттэй.

Тус хамтлаг 2024 оны арваннэгдүгээр, арванхоёрдугаар сард Европ болон Австралид аялан тоглолтоо хийсэн билээ. Харин энэ оны гуравдугаар сард АНУ, Канадад үргэлжлүүлэн тоглохоо мэдэгдлээ. Энэ үеэр хамтлагийн дуучин М.Мягмартай уулзаж, тоглолтод оролцох боломжтой эсэх талаар хэлэлцэх ажээ. М.Мягмар нь хоёр жилийн өмнөөс Канад улсад амьдарч, уран бүтээлээсээ хэсэг зайгаа аваад байгаа юм. “GUYS” хамтлагийн үнэнч сонсогчид тэднийг нэгэн тайзнаа хамтдаа харах баярт мөчийг хүлээж байна.

Эх сурвалж: zms.mn