С.УРТНАСАН

Улсын Их Хурлыг өөрсдөө тарахыг Эрх чөлөөг хэрэгжүүлэгч нам, Хөгжлийн хөтөлбөр нам, Ард түмний олонхийн засаглал нам, Сайн ардчилсан иргэдийн нэгдсэн намууд шаардаж “Үндэсний мэдээллийн төв”-д мэдээлэл хийлээ. Тус мэдээллээр Монгол Ардын нам, Ардчилсан намуудыг ээлжлэн, хамтран засгийн эрхийг барьж улсыг удирдсан боловч хуйвалдааны цөөнхийн засаглалыг бий болгож эрх мэдэл, улс орны баялгийг өмчилж тусгаар тогтнолд аюул учруулах хэмжээнд хүргэлээ гэж байв. Тухайлбал, Монгол Улсын Үндсэн хуультай боловч эзэд нь болох ард түмэн цөөнх эрх мэдэлтнүүдийн хяналтгүй эрх мэдлийг хязгаарлах боломжгүй болсон. 2024 оны УИХ-ын сонгуульд таван нам парламентад суудалтай болсон боловч цөөн хүний тохиролцооны төлөөлөл гэдэг нь олонд илт байгаа учраас ард түмний эрхийг хамгаалах чадваргүй гэж харж байна. Мөн өндөр хүүтэй зээлийн дарамтад иргэд өдөр хоногийг голоо зогоож өнгөрүүлж байгаа нь нийгмийн харилцааг гажуудуулж байгаа. Энэ нь эргээд төрдөө итгэх итгэлийг сулруулсан. Монгол Улсын ерөнхийлөгч У.Хүрэлсүх хувьсгал хийж болох хэмжээнд энэ асуудлын талаар ярьсан нь одоо хэрэгжих ёстой. Улсын Их Хурлыг тараах зөвлөл байгуулсан нь хэдхэн хүний мэдэлд шилжсэн хууль хэрэгжүүлдэггүй засаглалыг тарааж дараагийн засаглалыг байгуулах зорилготой. 1990-1992 онд улс төрийн товчоо огцорч байсантай адил одоогийн Улсын Их Хурлын гишүүд Үндсэн хуулийн заалтын дагуу өөрсдийн саналаар огцрохыг шаардаж байна. Биелэхгүй бол Үндсэн хуулийн 25 дугаар зүйлийн 16-д санаачлан ард иргэдийн санал асуулгыг авч шийдвэрлүүлнэ. Эх орныхоо төлөө үгээ хэлдэг, тэмцдэг, улс төрийн нам, төлөөллүүдийг оруулж засаглалыг шинэчлэх саналтай байгаа тул Монгол Улсын Их хурлын дарга, гишүүдэд улс үндэстнийхээ нийтлэг эрх ашгийг дээдлэн өөрөө тарах шаардлагыг хүргэж байна гэж улс төрийн нэг намын төлөөлөл ярив.

Эх сурвалж: www.zms.mn