Ч.ХАЖИД

Байгаль орчин аялал жуулчлалын яам зөвшөөрөл олгох боломжгүй компанид хууль зөрчиж химийн хортой бодисын зөвшөөрөл олгосон тухай “Бид туул голынхон” ТББ-аас өчигдөр мэдээлэл хийлээ

“Торгон шир бэлтгэл” ХХК суурьшлын бүсэд хүнсний үйлдвэрүүдийн дунд, дэд бүтэцгүй, үйлдвэрлэл явуулах объектгүйгээр ажиллаж байгаа бөгөөд хүрээлэн буй орчинд хөнөөл учруулж, химийн хортой бодис үйлдвэрлэж байгаа талаар “Бид туул голынхон” ТББ-аас гомдол мэдүүлж, анхааралдаа авахыг шаардаж байгаа юм. Энэ талаар “Бид туул голынхон” ТББ-ийн гүйцэтгэх захирал Б.Лхагвадорж “Торгон шир бэлтгэл ХХК-ийн үйл ажиллагаа явуулж буй газар бол арьс шир цуглуулах үйл ажиллагааны зөвшөөрөлтэй газар. Гэвч тус газарт үйлдвэрлэл явуулж байна. Үйлдвэрлэл явуулах зөвшөөрөлгүй газар салбарын яам ямар журмаар зөвшөөрөл олгосон бэ гэдэг нь сонин байгаа юм. Тус зөвшөөрлийг олгосон мэргэжилтэн нь зөвшөөрлийг нь олгочхоод ажлаасаа гарсан байсан. Хувь хүн өөрийн эрх мэдлээ ашиглан зөвшөөрөлгүй үйл ажиллагаа явуулж, натри, хүхэр зэрэг химийн хортой бодисыг ашиглаж, байгаль орчинд хохирол учруулж байна. Үүний улмаас бид АТГ, ЦЕГ-т хандаж, хууль бус үйл ажиллагааг таслан зогсоохыг хүсэж өргөдлөө өгсөн. Энэ асуудлыг хөхүүлэн дэмжиж байгаа Байгаль орчин аялал жуулчлалын яамны хэсэг албан тушаалтныг авлигын үндсэн дээр ийм шийдвэр гаргасан гэж үзэж байгаа. Эл асуудлыг шударгаар шийдэж, хууль бус ажиллагааг таслан зогсоохыг хүсэж байна” гэв.

Эх сурвалж: www.polit.mn