С.УРТНАСАН

Халзан бүрэгтэйн төслийг хэрэгжүүлэх эсэх асуудлаар  “Халзан бүрэгтэйг хамгаалцгаая” түр хорооноос өнөөдөр /11.18/ “Үндэсний мэдээллийн төв”-д мэдээлэл хийлээ.

Ховд аймгийн ИТХ-ын төлөөлөгч Л.Энхбаяр: - Халзан бүрэгтэй бол зөвхөн Ховд аймгийн Мянгад сумын хэмжээнд яригдах асуудал биш. Эрүүл аюулгүй орчинд амьдрах, ажиллах монгол хүн бүрийн эрхийн асуудал юм. Ард иргэд байж төр төвхнөдөг.  Уул уурхай, эрдэс баялгийн сайд Ц.Туваан тухайн суманд очиж ард иргэдтэй уулзаж, бодит нөхцөл байдалтай танилцах хэрэгтэй. 

Иргэн Баянзул: -Бид эх нутаг, эко системийнхээ төлөө 2012 оноос эхлэн тэмцэж ирсэн. Ерөнхий сайд Л.Оюун-Эрдэнэ ард иргэд нь зөвшөөрөхгүй бол бид энэ газрыг ухахгүй үйл ажиллагаа явуулахгүй гэж хэлж байсан.  Одоо хэлсэн амандаа хүрэх байх. Халзан бүрэгтэйн ордыг хамгаалах ард иргэд, ашиглах компанийн хооронд асуудал үүссэн боловч бид хүний биед зүй бусаар халдаж хууль зөрчөөгүй. Халзан бүрэгтэйн газрын ховор элементтэй ордыг зүй бусаар оролдсоноор цацраг туяа их хэмжээгээр дэгжиж байгаль орчинд нөлөөлж эхэлсэн. Мөн одоогоор байх ёстой хэмжээнээсээ 7-8 дахин их байгааг мэргэжлийн байгууллагын дүгнэлтээр тогтоосон. Тус газрын эко системийг хамгаалж иргэд олон мянгаараа нэгдэж эсэргүүцэж байгаа.

Иргэн Дуламсүрэн:- “Монголиан Рийр Ийрт корп” ХХК хуульд нийцэхгүй үйл ажиллагаа явуулж ирсэн. Нутгийн ард иргэдтэй малаас дор харьцдаг.  Хэлсэн үг нь эргэж харахын хооронд хувирдаг хүмүүс. Энэ асуудлыг шийдэж өгөх албан ёсны мэргэжлийн баг гаргаж өгөхийг хүсэж байна. Олон нийтийн эрх ашгийг зөрчиж байгаа учраас баруун бүсийн аймгийн нийт иргэд эсрэг байр суурьтай байгаа. Одоогоор 10 гаруй мянган иргэний гарын үсгээр баталгаажсан.

Мянгад сумын Гахайт багийн иргэн:-Халзан бүрэгтэйн ордыг нөөц багатай эдийн засгийн хувьд ашиггүй гэдгийг баталсан. Монгол орон минь энд тэндээсээ худалдагдаад дуусаж байгаад эх хүний хувьд би үр хүүхдийнхээ ирээдүйд санаа зовж байна. Эх оронгүй бол юуны төлөө хийж бүтээх билээ. Энэ газраа сэндийчүүлэхгүйн төлөө амиа ч харамлахгүй тэмцэнэ,эцсээ хүртэл явна гэлээ. 

Эх сурвалж: www.zms.mn