Т.САЙХАН
Хөгжлийн банкны тэргүүн дэд захирал Б.Амгалан Хөгжлийн банкны зээлийн эргэн төлөлттэй холбоотой асуудлаар мэдээлэл өглөө. Тэрээр "Шүүхийн шийдвэр гүйцэтгэх ерөнхий газарт шилжиж, албадан дуудлага худалдаагаар борлуулагдаж буй хөрөнгийн талаар дараах хариултыг өгчээ. "Одоогоор шийдвэр гүйцэтгэх ажиллагаанд шилжиж, долоон зээлийн 233 тэрбум төгрөг бүрэн төлөгдсөн бол 673 тэрбум төгрөгийн 17 зээлийг төлүүлэхээр ажиллаж байна. Хуулийн дагуу тогтоосон үнэлгээний 50, 70 хувьтай тэнцэх үнийн дүнгээр албадан дуудлага худалдааг явуулж байгаа. Зарим хөрөнгийн хувьд хариуцагч талаас албадан дуудах үнэлгээнд маргаан гаргадаг бөгөөд шүүхээс тус маргааныг эцэслэн шийдвэрлэсэн тохиолдолд тухай бүрд бид Хөгжлийн банкны албан ёсны вэб сайт бусад мэдээллийн хэрэгслээр дамжуулан олон нийтэд хүргэж байна. Эдгээр хөрөнгийн дэлгэрэнгүй мэдээллийг ШШГЕГ-ын албан ёсны вэб сайт, цахим сувгуудаас авах боломжтой. Ойрын хугацаанд хоёр зээлдэгчийн нийт 30 тэрбум төгрөгийн үнэ бүхий хөрөнгийг хуулийн дагуу 50 хувиар хямдруулсан үнээр хоёр дахь албадан дуудлага худалдаагаар худалдан борлуулахаар болсон. Орхон аймагт байрлах жилд 50,000 тн хийн конденсат боловсруулах үйлдвэр газрын хамт, Дархан-Уул аймагт байрлах 1,980 м.кв талбайтай үйлчилгээний зориулалттай үл хөдлөх хөрөнгө, 324 м.кв талбайтай агуулахын зориулалттай үл хөдлөх хөрөнгө, 3,963 м.кв талбай бүхий газрын хамт, Налайх дүүрэгт байрлах 25.94 гектар талбай бүхий шавартын орд, Чингэлтэй дүүрэгт байрлах 3,780 м.кв талбай бүхий үйлчилгээний зориулалттай үл хөдлөх хөрөнгө, 4,380 мкв газрын хамт, Налайх дүүрэгт байрлах 29,976 м.кв талбайтай, эзэмших эрхтэй газар, Төв аймгийн Сэргэлэн суманд байрлах 50,000 м.кв талбай бүхий эзэмших эрхтэй газар зэрэг хөрөнгийг дуудлагаар худалдах юм" гэв.
Эх сурвалж:www.polit.mn