Б.ОД

Энэ сарын эхээр томуугийн В вирус зонхилж байсан бол одоо томуугийн А вирус (H1N1) зонхилох болжээ. Тодруулбал, хүүхдийн тасагт хэвтэн эмчлүүлж байгаа хүүхдийн 80 орчим хувь нь амьсгалын замын цочмог хүнд халдвартай байна.

Энэ талаар (ХӨСҮТ)-ийн Томуугийн Үндэсний нэгжийн дарга А.Бурмаа “Эмнэлгийн ачааллын хувьд харьцангуй гайгүй байна. Хүүхдүүд шалаар хэвтэж эмчлүүлсэн зүйл алга. Хэрэв хүүхдийн эрчимт эмчилгээний тасаг дүүрвэл ор нэмэх арга хэмжээ авч төлөвлөгөөний дагуу ажиллаж байна. Гэхдээ томуу, томуугийн төст өвчин оргил үедээ орж байна. Томуугийн халдварт ихэвчлэн өртдөг насны бүлэг 5-9 насныхан байдаг. Тиймээс сургууль цэцэрлэгийн бүс халдварын идэвхтэй голомт гэсэн үг. Тэгэхээр одоо сургууль амарсан үед харьцангуй намжсан байдалтай болж байна. Гэвч цэцэрлэгийн үйл ажиллагаа хэвийн үргэлжилж, мөн шинэ жилийн баяр эхэлж байгаатай холбоотойгоор олноор цугласан үед амьсгалын замын халдвар хурдан тархдагийг санах хэрэгтэй” гэв.

Шинж тэмдгийн тухайд томуугийн халдварууд хоорондоо төстэй байдаг ч ихэнхдээ өндөр халуурч булчингаар шархирч өвддөг хордлогын шинж тэмдэг нь нэлээд илүү байна. Жишээлбэл, амьсгалын замын синцитиаль вирусын хувьд хүүхдийн амьсгалын доод замыг маш хурдан гэмтээгээд уушгины хатгалгаа үүсгэх эрсдэлтэй болдог байна.

Эх сурвалж:www.polit.mn