С.САРУУЛ

ХЭҮК-оос “Хүүхдийн хөдөлмөрийн чанарын судалгаа”-ны тайлангийн үр дүнг танилцуулав. Энэ үеэр гэрийн ажил болон өрхийн үйлдвэрлэлд хүүхдүүд хэдэн цаг зарцуулж буй талаар хуульч, судлаач Г.Түвшинжаргал “Хүмүүс ихэнхдээ цалин авдаг ажил хөдөлмөрийн талаар ярьдаг. Нөгөөтээгүүр хүүхдийн хөдөлмөр эрхлэлтэд гэрийн ажлыг давхар оруулах ёстой. Тиймээс хүүхдийн хөдөлмөрийн чанарын судалгааг хийхдээ гэрийн ажилд хэдэн цаг зарцуулж буйг асуумжийн арга болон онлайн ярилцлагаар судаллаа. Цалинтай ажил эрхэлдэг хэмээн хариулсан хүүхдүүд үүнийхээ зэрэгцээ гэрийн ажлыг хэрхэн хийж байгааг харахыг зорьсон. Үүнээс харахад гурав хүртэлх цагаар гэрийн ажил хийдэг маш олон хүүхэд байгаа юм. Энэхүү асуумж судалгаанд нийт 496 хүүхэд хариулт өгснөөс 397 нь гурав хүртэлх цагаар тогтмол гэрийн ажилд оролцдог хэмээн хариулсан. Харин заримдаа гурав хүртэлх цаг гэрийн ажилд оролцдог хэмээн 356 хүүхэд хариулжээ.

Энэхүү судалгаанд оролцсон 20 хүүхэд гэрийнхээ ажилд 7-8 цаг тогтмол оролцдог гэж хэлсэн. Түүнчлэн зургаан хүүхэд ес ба түүнээс дээш цаг тогтмол гэрийн ажилд оролцож байна хэмээх хариултыг өгсөн. Хамгийн сонирхолтой нь ес ба түүнээс дээш цаг ажилладаг хүүхдүүд дотор 5-11 насны хүүхэд олон байсан. Бага насны хүүхдийг мэдлэг, мэдээлэлгүйгээр нь далимдуулж олон цаг ажиллуулж байна. Эцэг, эхчүүд нь хүүхдүүдээ сургуульд сурахаас өмнө эсхүл бага ангид байх үед нь олон цагаар гэрийн ажил хийлгэх тохиолдол илэрч байна. Энэ асуудал хүүхдийн хөдөлмөр эрхлэлт гэдгээр шийдвэрлэгдэхгүй байж магадгүй. Гэхдээ хүүхдийн эсрэг хүчирхийлэл хэмээн тооцох үндэслэлтэй юм. Хүүхдэд гэрийн ажил хийх цагийн хязгаарыг тогтоох саналыг энэхүү судалгааны үр дүнгээс гаргасан. Улмаар Хөдөлмөр, нийгмийн хамгааллын яамнаас хүүхдийн гэрийн ажилд зарцуулах цагийн хязгаарыг тогтоож өгсөн” гэлээ.

Эх сурвалж: www.polit.mn