Т.САЙХАН

УИХ дахь МАН-ын бүлгийн хуралдаанаар хоёр асуудал хэлэлцэн шийдвэрлэжээ.  МАН-ын бүлгийн дарга Д.Тогтохсүрэн  "Жагсагчид авлига албан тушаалын хэрэгтнүүдэд хариуцлага тооц гэдэг нэг том шаардлага тавьж байгаа. МАН-ын бүлгийн зүгээс Ерөнхий сайдын саналыг үндэслэн гурван шийдэл гаргалаа.

Нэгдүгээрт, Засгийн газар жагсагчидтай уулзах, саналыг нь сонсох, үг хэлэх нөхцлийг нь бүрдүүлэх, хэлэлцээрт орж асуудлыг аль болох хурдан шийдвэрлэх шаардлагатай байна.

Хоёрдугаарт, Эрүүгийн хуульд нэмэлт өөрчлөлт оруулах зайлшгүй шаардлагатай байна. Авлига, албан тушаалын гэмт хэргийн ялын бодлогыг чангатгах хэрэгтэй. Иймээс Эрүүгийн хууль, Эрүүгийн хэрэг хянан шийдвэрлэх тухай хуулийг Засгийн газар УИХ-д өргөн барьж, энэ долоо хоногт багтаж их хурал хэлэлцэх эсэхийг нь шийдэхээр тогтож байна. Ингэхдээ үндэслэлгүй хөрөнгөжихтэй холбоотой асуудлыг авч үзэх шаардлагатай.

Бид цаашид байгалийн баялагийн төрийн өмчийн менежментийг сайжруулах асуудал чухал байна. Цаашид ийм байдал үүсэхгүй байх эрх зүйн үндсийг бий болгох шаардлагатай байна. Энэ хүрээнд Төрийн болон орон нутгийн өмчийн тухай хууль, Төрийн өмчийн компаниудын тухай хууль, Уул уурхайн бүтээгдэхүүний биржийн тухай хуулийг батлах шаардлагатай байна гэж үзлээ. 

Гуравт, ҮАБЗ-өөс зөвлөмж гаргаад гэрээ хийж байгаа асуудлууд сүүлийн 10 гаруй жил үргэлжилж байна. Үүний эрх зүйн орчинг боловсронгуй болгох хэрэгтэй байна. Засгийн газар, УИХ шийддэг чиглэл рүү орохгүй бол болохгүй нь" гэв.

Эх сурвалж:www.polit.mn