Туркийн Ерөнхийлөгч асан Кенан Эврен болон тус улсын Агаарын цэргийн хүчний командлагч асан Тахсин Шахинкая нарыг 1980 оны цэргийн эргэлтэд оролцсон хэмээн буруутгаж бүх насаар нь хорих ял оноожээ. 96 настай Эврен, 89 настай Шахинкая нарыг “Төрийн эсрэг гэмт хэрэг хийж, цэргийн эргэлтийг зохион байгуулсан” гэж буруутгасан байна. Кенан Эврен төрийн эргэлт хийх үеэр армийн Жанжин штабын дарга байжээ. Цэргийн эргэлтийг зохион байгуулсан хүмүүсээс Эврен, Шахинкая хоёр л одоо амьд сэрүүн байгаа аж. Цэргийн эргэлтийн дараа Эврен Туркийн Ерөнхийлөгч болж, тус улсад цэргийн засаг захиргаа бий болсон билээ.

2010 онд Ерөнхий сайд Режеп Тайып Эрдоган Үндсэн хуульд өөрчлөлт оруулж Кенан Эврен, Тахсин Шахинкая нарын халдашгүй эрхийг цуцлуулсан билээ. 2012 онд дээрх хоёр эрхэм шүүхэд дуудагдсан аж. Гэсэн ч тэд эрүүл мэндийн байдлаас шалтгаалж шүүх хуралд суугаагүй юм.