М.ХҮСЛЭН

Иракийн Гадаад хэргийн сайд Хошияр Зебари Багдад Вашингтоноос улсынхаа нэлээд хэсгийг хяналтад аваад буй исламын зэвсэгт дайчдад агаараас цохилт өгөхөд туслахыг хүссэнийг мэдээлэв. Саудын Арабын сэт­гүүлчдэд өгсөн ярилц­лагадаа Зебари агаараас цохилт хийх хүсэлтийг хоёр талын аюулгүйн хэлэлцээрийн хүрээнд шийдвэрлэх гэнэ. Тэрээр нэмж хэлэхдээ мөргөлдөөнийг зогсооход зөвхөн цэрэг зэвсгийн ажиллагаа хангалтгүй бөгөөд улс төрийн арга зам ч хайж байгаа гэнэ.

“Ирак, Левантегийн исламын улс” нэртэй исламын хэт даврагчдын зэвсэгт бүлэглэл өнгөрсөн долоо хоногт Иракийн хойд хэсгийн олон хот, тосгодыг эзлэн авч нийслэл Багдадад дөхөж ирээд байгаа аж. Иракийн Засгийн газраас хэт даврагчдын дайралтыг зогсоохын тулд АНУ-аас албан ёсоор агаарын дэмжлэг хүссэнийг Америкийн цэргийн командлагч генерал Мартин Демпси мэдэгдсэн билээ. Гэхдээ Иракт агаарын цохилтоор дэмжлэг үзүүлэх эсэхийг АНУ-ын Конгрессын хуралдаанаар эцэслэн шийдвэрлэх юм. Зургадугаар сарын 16-нд АНУ-ын Ерөнхийлөгч Барак Обама Багдад дахь ЭСЯ-ыг хамгаалахад 275 америк цэрэг илгээхээр болсноо мэдэгдэж байсан.

Алан хядах “Аль-Каида” бүлэглэлтэй сүлбээтэй “Ирак, Левантегийн исламын улс” зэвсэгт бүлэглэл нь Ирак, Сирид 10 мянга орчим зэвсэгт дайчинтай гэнэ.