М.ХҮСЛЭН

Словакийн Ерөнхийлөгчөөр сонгогдсон Андрей Киска өнгөрсөн ням гаригт тангараг өргөж, албан ёсоор ажилдаа орсон байна.

Өнгөрсөн гуравдугаар сарын 29-нд болсон сонгуульд олонхийн санал авч Төрийн тэргүүнээр сонгогдсон Андрей Киска бизнесмэн бөгөөд хүмүүнлэгийн үйлсэд идэвхтэй оролцдог өглөгч нэгэн байсан аж. Тэрээр хорт хавдарт нэрвэгдсэн хүүхдүүдэд зориулж сан байгуулж байв. Андрей Кискагийн дэвшүүлсэн авлига, хүнд суртлын эсрэг идэвхтэй тэмцэнэ гэсэн мөрийн хөтөлбөр сонгогчдод ихэд таалагдсан аж.

Шинээр сонгогдсон Төрийн тэргүүн улсаас цалин авахаас бүрмөсөн татгалзсан байна. Словакийн Ерөнхийлөгч жилд 600 мянган еврогийн цалин авдаг. Харин Кискагийн нэг жилд олох орлого нь 700 мянга орчим евро гэнэ. Сонгуулийн өмнөх кампанит ажилд зориулсан бүх зардлыг тэрээр өөрийн хөрөнгөөсөө санхүүжүүлсэн аж. Кампанит ажилд зарцуулсан мөнгө нь Ерөнхийлөгчийн таван жилд авах цалингаас ч илүү байжээ.

Андрей Киска Ерөнхийлөгчийн тангараг өргөх ёслолд хэлсэн үгэндээ Европын холбоо болон НАТО-тай харилцаагаа улам сайжруулах болно гэжээ. Мөн тэрээр Украины асуудалд санаа зовниж буйгаа илэрхийлсэн байна. Киска тангараг өргөх ёслолдоо орон гэргүй 15 тэнэмэл хүнийг урьж оролцуулан парламентын гишүүдтэй хамт хоолонд урьжээ. Андрей Киска Словакийн дөрөв дэх Ерөнхийлөгчөөр сонгогдсон ба өмнө Коммунист намд элсэж байгаагүй анхны Төрийн тэргүүн болж байгаа аж.