М.БИЛЭГ

Төрийн шагналт яруу найрагч Р.Чойномын нэрэмжит “Оюухай-2014” наадам Хэнтий аймгийн Дархан суманд боллоо. Ес дэх удаагаа болж буй тус наадамд 30 гаруй яруу найрагч оролцсон байна.  Түүнээс МЗЭ-ийн шагналт яруу найрагч М.Уянсүх түрүүлж, яруу найрагч Б.Чулуунцэцэг дэд байрын эзэн болсон юм.   Удаах байруудыг  В.Нэргүй, Б.Энхжаргал, залуу яруу найрагч Э.Гантулга нар шалгарчээ.  Тус наадмыг Р.Чойномын нэрэмжит “Өд” сан, Хэнтий аймгийн Дархан сумын Засаг даргын Тамгын газар, Монгол “Уламжлал” академи хамтран зохион байгуулсан юм. “Оюухай-2014” алтан цомын эзэн болсон М.Уянсүхийн эхний даваанд уншсан шүлгийг толилуулъя.

Р.ЧОЙНОМЫН ДУРСГАЛД

Цусан дусал шиг бүдэгхэн хавирган сартай тэнгэрт

Цуутай дорныг эмгэнүүлсэн найрагчийн сүнс шингэжээ

Хатуу дэглэмтэй шоронд тарчилж зовсон түүнийг

Хан тэнгэр ингэж өөртөө дуудаж аваачжээ

Газрын хүмүүс одоо гэм нүглээ наманчилж

Гал шиг халуун шүлгийг нь туг шиг өргөх болжээ

Эрх чөлөөний үнэ цэнэ юунд байдгийг мэдэж

Эмгэнэлт түүний дурсгалд хөшөө босгож мөнхөлжээ

Тэнгэрт байгаа сар шиг цусан туяатай шүлгүүд

Тэмцэж ялсан түүний амийг орлож үлджээ

Хязгааргүйн тэртээ одсон найрагчийн хойноос гашуудаж

Хий үзэгдэл шиг хүмүүс орчлонг дүүргэх ажээ