М.ХҮСЛЭН

Испанийн парламен­тын доод танхим тус улсын хаан Хуан Карлосын хаан ширээгээ хунтайж Фелипед шилжүүлэхийг зөвшөөрсөн хуулийн төслийг баталaсан байна. Хуулийн төслийг эрх баригч Ардын намын болон сөрөг хүчний социалистууд ч дэмжжээ. Парламентын доод танхимын 299 гишүүн хааныг ширээнээс буух хуулийн төслийг дэмжиж, зүүнтэн болон салан тусгаарлах үзэлтэй намын 19 депутат л эсрэг санал өгсөн байна. Хуулийн эсрэг санал өгсөн гишүүд парламентын индэрт “Испанийг Бүгд найрамдах улс болгох талаар бүх нийтийн санал асуулга явуулъя” гэсэн санаачилга гаргажээ.

Олон нийтийн дунд явуулсан судалгаагаар Испани улсын хүн амын талаас илүү хувь нь улс оронд Үндсэн хуульт хаант засаглалыг хадгалан үлдэхийг хүссэн байна. 40 жил гаруй хаан ширээнд заларсан 76 настай Хуан Карлос энэ сарын эхэнд хааны суудлаас татгалзаж, хүүдээ өгөхөө мэдэгдсэн билээ.

1970-аад онд генерал Франкогийн дарангуйллаас хойш Испани улс ардчилсан засаг­лалд шилжихэд нь онцгой үүрэг гүйцэт­гэсэн Хуан Карлосын нэр хүндэд гүнж Кристинагийн авлигын хэрэг муугаар нөлөөлсөн юм. Түүнчлэн хөгшин хааны эрүүл мэнд ч сайн­гүй байгаа. Сүүлийн жи­лүүдэд тэрээр хэд хэдэн удаа мэс засалд оржээ.

Хэрэв хуулийн төслийг парламентын дээд танхим болох Сенатаас дэмжвэл зургадугаар сарын 19-нд 46 настай хунтайж Фелипе VI Филипп нэртэй болж хаан ширээнд сууж, тангараг өргөхөөр төлөвлөжээ.