Т.САЙХАН

Ерөнхий сайд Л.Оюун-Эрдэнэ, Шадар сайд С.Амарсайхан, Эрүүл мэндийн сайд С.Энхболд нар УОК-ын Шуурхай штабт ажиллажээ. Хуралдааны эхэнд Шадар сайд С.Амарсайхан халдварын нөхцөл байдлын талаар болон халдварын эсрэг авч буй арга хэмжээг танилцуулсан юм. 

Харин ЭМЯ-ийн сайд С.Энхболд орон нутагт халдварын тархалт буурч байгаа талаар мэдээллээ. Тэрбээр "Орон нутгийн эрүүл мэндийн байгууллагуудаас одоохондоо ямар нэгэн мэдээлэл ирээгүй байна. Халдвар тархах нууц үеийн хугацаа бий. Тэгэхээр одоохондоо асуудал гараагүй байна. Орон нутгийн хүнд хүн болон өвчлөлийн тоо нийслэлтэй адилхан буурч байгаа" гэлээ. 

Ерөнхий сайд Л.Оюун-Эрдэнэ хотод халдварын тоо буурч, хөдөө орон нутагт ихсэх эрсдэл үүсгэхгүй байх тал дээр анхаарч ажиллахыг үүрэг болголоо.

Тэрбээр "Иргэд маань дархлаагаа сайжруулахын тулд хөдөө орон нутаг явахыг зөвшөөрч байгаа. Гэхдээ халдвар хамгааллын дэглэмээ сайтар сахиад, зөвхөн гэр бүлийн хүрээнд байгаарай. Голын эрэг дээр маскгүй олноороо бүү цуглаарай. Вакцины нөлөөгөөр хөл хорио тогтоогоогүй ч халдвар буурч байна. Хүн хоорондын зайгаа сайн бариарай. Хөдөө орон нутагт вакцинжуулалт харьцангуй хожуу эхэлсэн учраас хөдөө орон нутгийн иргэдэд халдвар тараахгүй байх асуудалд иргэнийхээ хувьд анхааралтай хандаарай. Мөн үер усны аюул их байгаа учраас бүгдээрээ болгоомжтой аялж зугаалаарай. Зарим орон нутагт очиж байгаа хүмүүсийн тоо их байна. Тиймээс аймгууд руу зорчихдоо аль болох хүмүүс бага явж байгаа аймгуудыг сонгож аялавал өөрийгөө болон өрөөлийг хамгаалах болно шүү" гэлээ.

Эх сурвалж:www.polit.mn