Ч.ГАНТУЛГА

“Эзэнтэй дуу” булангаараа энэ удаад гавьяат жүжигчин Б.Сарантуяа болон “Инээмсэглэл” хамтлагийн дуучин Н.Ганхуяг нарын “Чиний үгүйд” дууны тухай хүргэж байна.

Дуучин Б.Сарантуяа: ОДОО Ч СОНСООД СЭТГЭЛ ДОГДОЛДОГ

“Чиний үгүйд” дуу тайзнаас эгшиглээгүй удаж байна. Анх Хуягаатайгаа дуулж байлаа. Залуу байсан учраас зүгээр л тэр үеийн эрч хүч, чин сэтгэлээсээ дуулсан. Одоо хүртэл сонсоод догдолдог юм. Магадгүй залуу насны минь нандин дурсамж шингэсэн учраас мэдрэмж нь хэвээрээ байгаа байх. Одоо ч хүмүүс сонсох дуртай юм билээ. Хааяа FM, радиогоор явж сонсогддог.

Ая зохиогч Б.Долгион: ЭЗЭНТЭЙ ДУУ ГЭДЭГ МӨНХ НАСТАЙ ЮМ

Манай “Инээмсэглэл” хамтлагийн урын сангийн дуу. Бид анх энэ дууг яаж дуулах вэ гээд ярилцаж байлаа. Тухайн үед Сараа, Хуягаа хоёр хайр сэтгэлийн холбоотой байсан юм. Тэр хоёрт зориулж бичсэн гэж ойлгож болно. Үгийг нь манай С.Цогтсайхан бичиж, аялгууг нь Б.Цогтдэлгэр зохиосон. Эзэнтэй дуу гэдэг ийм л мөнх настай юм даа. Сонсох бүрт хоёр дуучны маань чин сэтгэл мэдрэгддэг шүү. Бие биенээ хайрласан тэр сэтгэл нь “Чиний үгүйд”-ийг амилуулсан гэж боддог юм.  

Чиний үгүйд

Хүсэл татсан хавар болдгоороо боллоо

Хүлээж байсан шувууд ирдгээрээ ирлээ

Хайрын бяцхан төгөл нахиагаа дэлгэлээ

Харин ганцхан чамайгаа би үгүйлнэ

Ангасан сэтгэлийн минь талд хур болон орооч

Амраг сэтгэлийн минь нууранд хун болон умбаач

Хур борооны ус хуурай газрыг дэвтээлээ

Хунгийн сүрэг нисээд нуурын хөвөөнд буулаа

Газар дэлхийг сэргээж ганган цэцэгс дэлгэрлээ

Ганцхан чиний үгүйд гансрах сэтгэл төрнөө

Ангасан сэтгэлийн минь талд хур болон орооч

Амраг сэтгэлийн минь нууранд хун болон умбаач

Ангасан сэтгэлийн минь талд хур болон орооч

Амраг сэтгэлийн минь нууранд хун болон умбаач