Т.САЙХАН

Ерөнхийлөгч Х.Баттулгын бүрэн эрхийн хугацаа өнгөрсөн баасан гаригт дуусгавар болсон.  Тэгвэл пүрэв гаригт буюу Ерөнхийлөгчөөс буухаасаа ердөө нэг хоногийн өмнө зарлиг гаргаж, хорих ял эдэлж буй 13 хүнд уучлал үзүүлсэн юм.  Ерөнхийлөгч Х.Баттулгын зарлигт  Тагнуулын ерөнхий газрын дарга асан Б.Хурц, УИХ-ын гишүүн асан Д.Дамба-Очир нарын 13 хүн багтсан бөгөөд  Шүүхийн шийдвэр гүйцэтгэх ерөнхий газарт зарлигийг хүргүүлж, Шүүхийн шийдвэр гүйцэтгэх ерөнхий газраас 13 хүний хоригдож байгаа хорих анги руу шийдвэрээ явуулж, сулласан байна.

Тэгвэл суллагдсан 13 хүний дотор хүн амины хэрэгт ял эдэлж буй Б.Махбал багтсан гэх мэдээлэл байна.   Түүний хэргийг сануулахад, Зам,тээврийн хөгжлийн яамны байранд өнгөрсөн 2018 оны наймдугаар сарын 9-ний 21:00 цагт хүн амины хэрэг гарсан байдаг. Хэргийн мөрөөр хуулийн байгууллага мөрдөн байцаалт явуулж, ЗТХЯ-ны Хяналт шинжилгээ, үнэлгээ, дотоод аудитын газрын дарга Т.Гомбосүрэнгийн амийг Төрийн захиргаа удирдлагын газрын дарга Б.Махбал хөнөөсөн болохыг тогтоосон билээ.

Хамгийн сүүлд Дээд шүүх  яллагдагч Б.Махбалд холбогдох хэргийг хянан хэлэлцээд давж заалдах шатны шүүхээс гаргасан 11 жилийн хорих ялыг нь хэвээр үлдээж шийдвэрлэсэн байдаг. 

Эх сурвалж:www.polit.mn