Т.САЙХАН

АН-аас санал тоолох төхөөрөмжид хөндлөнгийн нөлөөлөл ордог байж болзошгүй гэсэн мэдээлэл хийсэн.  Мөн СЕХ-нд мэдэгдэл, шаардлага, хүсэлт ирүүлсэн. Үүний дагуу СЕХ-ноос Нийслэлийн прокурорын газарт албан бичгээр хандсан. Мөн уг бичгийн хувийг Тагнуулын ерөнхий газарт хүргүүлжээ. 

Энэ талаар СЕХ-ны Хууль эрхзүйн хэлтсийн дарга Б.Бат-Эрдэнэ "Мэдээлэлтэй холбоотой асуудлыг шалгах шаардлагатай. Уг үйл явдал нь Эрүүгийн хуульд заасан сонгууль будлиантуулах гэмт хэргийн шинжтэй үйлдэл байж болзошгүй гэж үзэж байна. Мөн өмнө нь энэ асуудлын дагуу гомдол гарч, шалгаж байсан эсэхийг олон нийтэд мэдээлэх шаардлагатай юм.

Ер нь сонгууль дөхөөд ирэхээр л санал тоолох төхөөрөмжтэй холбоотой, үнэн худал нь мэдэгдэхгүй, олон нийтийг төөрөгдөлд оруулсан мэдээлэл цацагддаг. Гэхдээ 2012 оноос хойш санал буруу тоолоод, зөрүүлсэн гэх баримтыг гаргаж ирж байгаагүй. Тиймээс энэ асуудалд цэг тавих ёстой гэж үзэж байна" гэлээ. 

СЕХ-ны дэргэдэх Мэдээллийн технологийн төвийн захирлын үүргийг түр орлон гүйцэтгэгч Х.Баясгалан "2012 оноос хойш санал тоолох төхөөрөмжийг ашиглаж, найман сонгууль зохион байгуулсан байна. Сонгууль болгоны үеэр болон санал хураалтын дүн гарсны дараа санал тоолох төхөөрөмжтэй холбоотой худал мэдээлэл цацагддаг. Лицензийн тухай асуудал яригдаад байна. Санал тоолох төхөөрөмжийг ашиглах тоолондоо лицензийн төлбөрийг төлөөд явдаг. Хугацаа нь дуусна гэдэг ойлголт байхгүй. 

Мөн саналын хуудас бар кодгүй болж байгаа гэх ташаа мэдээлэл тараалаа. Санал тоолох төхөөрөмж бар кодыг таньж уншдаг. 2020 онд болсон сонгуульд гэхэд 18 мянга гаруй нэр дэвшигч өрсөлдсөн. Тухайн нэр дэвшигч бүрийг нэг бүрчлэн танихын тулд бар код олгодог. 

Мөн мэдээлэл тараасан хоёр хүн манайд ажиллаж байгаагүй.  Түүнчлэн төхөөрөмжийг хакердах боломжгүй. 

Өмнө нь хуулийн хүрээнд саналын хуудсын 50 хүртэлх хувийг гараар тоолдог байсан бөгөөд нэг ч удаа үр дүн зөрж байгаагүй. Энэ удаагийн сонгуулиар бүх саналын хуудсыг гараар тоолно. Үүнийг маш зөв гэж бодож байгаа" гэсэн юм. 

Эх сурвалж:www.polit.mn