Т.САЙХАН

УИХ-ын чуулганы өнөөдрийн /05.20 /нэгдсэн хуралдаанаар Хуульчийн эрх зүйн байдлын тухай хуулийг хэлэлцэх эсэхийг хэлэлцэв.

Засгийн газраас өргөн мэдүүлсэн уг хуулийн төслийн хэлэлцүүлгийн явцад гишүүдээс цөөнгүй шүүмжлэл гарсан. Тухайлбал, УИХ-ын гишүүн Н.Алтанхуяг “Хуульч бэлтгэх орой, эчнээ ангийг устгах хэрэгтэй. Хуульч болох гээд хошуураад байгаа хүмүүст чанаргүй боловсрол эзэмшүүлдэг явдлаа болимоор байна. Хүний хувь заяа шийддэг мэргэжил шүү дээ. Бакалавр суурьтай хүмүүсийг хуульчаар бэлтгэх хэрэгтэй” хэмээн байр сууриа илэрхийлсэн.

Мөн УИХ-ын гишүүн Б.Энхбаяр “Хуульчдын холбоо бол олон нийтийн байгууллага. Дарга хэв шинж оруулахгүй гэдэг үүднээс ерөнхийлөгч нь хоёр жил тутамд шинэчлэгддэг. Гэтэл дөрвөн жил тутам шинэчлэгддэг болгосноор бүх эрх мэдлийг ерөнхийлөгчид төвлөрүүлэх гэж байна" хэмээсэн юм.

Ийнхүү хуулийн төслийг хэлэлцэх эсэхээр санал хураалт явуулахад нийт 63 гишүүн оролцсоноос 22 нь дэмжиж, 41 нь татгалзав.  Өөрөөр хэлбэл, Засгийн газраас өргөн мэдүүлсэн Хуульчийн эрх зүйн байдлын тухай хуулийг хэлэлцэхийг УИХ-ын гишүүдийн олонх дэмжсэнгүй.

Эх сурвалж:www.polit.mn