Т.САЙХАН

УИХ дахь АН-ын бүлгийн гишүүд Төв талбайд өлсгөлөн зарлаад  байгаа.  Үүнтэй холбоотой цагдаагийн байгууллагаас мэдээлэл өглөө. Цагдаагийн байгууллагаас цар тахал, хөл хорионы үед Төв талбайд суулт, өлсгөлөн хийх боломжгүй бөгөөд гишүүдийн дэмжигч нар талбайд цуглан эрсдэл үүсгэх нөхцөл бий болох магадлалтайг хэлсэн юм. 

Сүхбаатар дүүргийн цагдаагийн газрын дарга О.Чинбат "Хорио цээрийн дэглэм тогтоосон байна. Энэ дэглэмийг тогтоолгох гэж бид ажиллаж байна. Эрсдэлтэй нөхцөл байдал үүсээд байна. УИХ-ын гишүүд суулт зарласантай холбоотой иргэд нэмэгдэж ирэх магадлалтай. Нийгмийн аюулгүй байдал, нийтийн хөл хориотой холбоотой би хариуцсан нутаг дэвсгэртээ хуулийг хэрэгжүүлж байна. Жагсаал цуглаан зохион байгуулах, гэр майхан оруулах, өлсгөлөн суулт зохион байгуулах хуулийн зохицуулалттай. Улс орны хэмжээнд гамшгийн үед жагсаал цуглаан зохион байгуулах хориотой. Хууль эрхзүйн зохицуулалт зөрчих юм бол хариуцлага хүлээх ёстой. УИХ дахь АН-ын бүлгийн дэд дарга Н.Ганибалд бид нөхцөл байдал, шаардлагыг танилцуулсан. Хууль бүх хүнд тэгш үйлчлэх ёстой" гэлээ. 

Эх сурвалж:www.polit.mn