Т.САЙХАН

Ерөнхийлөгчийн сонгуульд оролцох улс төрийн намууд хуульд заасны дагуу өнөөдрийн /05.05/ дотор нэр дэвшигчдийнхээ материалыг Сонгуулийн ерөнхий хороонд хүлээлгэж өгөх ёстой. Үүний дагуу СЕХ-оос МАН болон Хөдөлмөрийн үндэсний нам (ХҮН)-аас нэр дэвшигчдийн материалыг хүлээн авлаа. Харин хоёр хуваагдаж хоёр талд нэг нэг хүнийг нэр дэвшүүлээд буй АН-ыаас нэр дэвшигчдийн материалыг хүлээн авахаас татгалзлаа.

Сонгуулийн ерөнхий хорооны дарга П.Дэлгэрнаран "АН-ын нэр бүртгэлтэй, дүрэм бүртгэлтэй, улсын гэрчилгээтэй хэдий ч тамганы асуудалтай байна. Үндсэн хуулийн 31.2-д заасны дагуу Ерөнхийлөгчийн сонгуульд нэг нэр дэвшигч тодорно гэсэн ойлголт бий. Үүнийг Ерөнхийлөгчийн сонгуулийн хуульд тусгаж өгсөн. Улс төрийн намууд дангаараа болон хамтарч оролцож болно. АН хоёр хэсэг газар нэр дэвшүүлж, нэг хүнийг нэр дэвшүүлэх тал дээр дотоод маргаантай байна. Энэ бол нийгмийн амьдралд нөлөө бүхий нам хуульд заасан хэм хэмжээний дагуу нэр дэвшигчээ тодруулж, сонгох, сонгогдох эрхийг эдлэх ёстой. Нэг хүнийг нэр дэвшүүлнэ гэдэг асуудал дээр маргаан үүсэхээр байна. Асуудлаа дотооддоо шийдэхийг хүсч байна. Аудитын газраас зөвхөн мөрийн хөтөлбөрт дүгнэлт хийсэн байна. Улсын дээд шүүхийн лавлагаагаар С.Эрдэнэ тус намын даргаар сонгогдсоныг бүртгэсэн байгаа юм. Энэ асуудлыг цэгцэлж, та бүхэн дотооддоо асуудлаа шийдэж, 18.00 цагаас хойш дахин ирнэ үү. Бид нэг намаас зөвхөн нэг материал авах ёстой. Материал хүлээн авах хуулийн хугацаа өнөөдрийн 24.00 цагт дуусгавар болно" гэлээ. Тэрээр энэхүү тайлбарыг хоёр хуваагдаад буй АН-ын аль алиных нь төлөөлөлд хэлсэн юм.

Эх сурвалж:www.polit.mn