Т.САЙХАН

2021.04.16.  Өнөөдөр улс төрийн хүрээнд анхаарал татах хоёр  ч шүүх хуралдаан болох байв. Тухайлбал,  Үндсэн хуулийн Цэцийн дунд суудлын хуралдаанаар  одоогийн  Ерөнхийлөгч Х.Баттулгын нэр дэвших эрхтэй эсэх асуудлыг хэлэлцэх бол Дээд шүүх  ЗГХЭГ-ын дарга асан  С.Баярцогт нарыг гомдлыг хэлэлцэх байв.  Гэвч хоёулаа тодорхой шалтгааны улмаас товлосон цагаасаа хойшилжээ. 

С.Баярцогт нарыг шүүх хурал өглөө 09.00 цагт эхлэх байсан ч Дээд шүүхэд коронавирусын сэжигтэй дөрвөн ч тохиолдол бүртгэгдсэн учраас битүүмжлээд байна.  Мөн товлосон шүүх хуралдаануудыг тодорхойгүй хугацаагаар хойшлууллаа. 

АТГ-аас ЗГХЭГ-ын дарга асан С.Баярцогт нарыг “Оюутолгойн гэрээг үзэглэхдээ эрх мэдлээ ашиглаж, бусдад давуу байдал олгосон байж болзошгүй гэх үндэслэлээр яллагдагчаар татаж, ял оноосон билээ.

Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхээс Сангийн сайд асан С.Баярцогтод 10 жилийн хорих ял оноосон байдаг. Харин давж заалдах шатны шүүх анхан шатны шүүхийн шийдвэрийг өөрчилж, түүнд оноосон ялыг дөрвөн жил найман сар болгон бууруулсан. Харин тэрбээр өмгөөлөгчөөрөө дамжуулан Улсын Дээд шүүхэд хандсан. Тэгвэл Улсын Дээд шүүх хуралдааныг товлоод байсан ч ийнхүү хойшлов. 

Тэгвэл цэц дээр өглөө 09.30 цагт болох байсан хуралдаан үдээс хойш болж хойшлов. Үндсэн хуулийн өөрчлөлтөөр одоогийн Ерөнхийлөгч Х.Баттулгын нэр дэвших эсэх асуудалд хөндөгдсөн.  Цэцийн нэг гишүүн Ц.Нанзаддорж ирээгүй учраас хуралдаан хойшилсон гэж албаныхан тайлбарлаж байгаа. Харин саяхан буюу 16.00 цагийн үед Ц.Нанзаддоржийн оронд Ж.Эрдэнэбулганыг хуралдаанд оруулж хуралдааныг эхлүүлсэн гэх мэдээлэл байна. 

Одоогийн Ерөнхийлөгч Х.Баттулга болон өмнө нь ерөнхийлөгчөөр ажиллаж байсан иргэд ирэх Ерөнхийлөгчийн сонгуульд нэр дэвших эрхгүй гэх гомдлыг УИХ-ын гишүүн Т.Доржханд, хуульч Н.Үүрцайх, МУИС-ийн багш, доктор О.Мөнхсайхан нар Үндсэн хуулийн цэцэд хандаж гаргасан.  Энэхүү гомдлыг өмнө нь бага суудлын хуралдаанаар хэлэлцэж хүчингүй болгож байв.  Тэгвэл энэ удаа  Үндсэн хуулийн цэцийн дунд суудлын хуралдаанаар  ямар шийвэр гаргах бол гэдэг нь анхаарал татаж буй юм. 

Эх сурвалж:www.polit.mn