Б.ТУУЛ

“COVID-19” цар тахлын үед нийслэлийн зургаан сургуулийн 90 гаруй багш нар интеграци хичээл заах арга зүйн туршлага солилцож байгаа билээ. Энэ тухай Нийслэлийн 12 дугаар сургуулийн Монгол хэлний Б.Анхцэцэг багштай ярилцлаа.

-Цахимаар, онлайнаар хичээл заах нь багшаас хэр ур чадвар шаардаж байна. Танхимын сургалттай харьцуулахад хичээл боловсруулах, арга зүйгээ сайжруулах, технологийн мэдлэг чадвараа хөгжүүлэх гээд ур чадвар их шаардаж байгаа байх?

-Цахимаар, онлайнаар  хичээл заах нь багшаас маш их ур чадвар шаардаж байна. Хамгийн түрүүнд цахим хичээлийн бэлтгэл хангах, түүнийг сайтар төлөвлөж боловсруулах  тал дээр нэлээд их ур чадвар шаардаж байна. Жишээ нь, мэргэжлийн, мэдээлэл боловсруулах, IT мэдлэгээ сайжруулах, цаг төлөвлөж сурах гэх мэт наад зах нь багшийн цахим орчин дахь соёл их чухал байна. Ихэнх  тохиолдолд цахим сургалтыг гэрээсээ удирдан хөтлөж явуулж байна. Мөн техникийн бүрэн бүтэн байдал гээд ажлын орчин болон өөрийн сэтгэлзүйг бүрдүүлэх хэрэгтэй юм байна. Энэ бүгдийг бэлтгэхэд багшийн зүгээс хувийн зохион байгуулалт чухал бөгөөд мэдлэг ур чадвар бас их нөлөөлж байна.  Тиймээс алхам тутамдаа бусдаас болон цахим орчноос суралцаж өөрийгөө хөгжүүлж байна.

-Багш нарыг харахад өдөржин зүүм, меетинг хичээлтэй байх юм. Энэ нь багш, сурагчдад аль алинд нь асуудалтай юм шиг санагдсан?

-Цахим орчны сургалт танхимын сургалтыг бодвол компьютер дээр ажиллах чадварыг шаардахаас гадна сурагчдын даалгаврын гүйцэтгэлийг шалгаж тэдэндээ эргэж зөвлөгөө өгөх, оношлогооны үр дүнд анализ хийж дүн шинжилгээ хийх зэргээр удаан хугацаагаар суух шаардлага гардаг тул хөдөлгөөний дутагдалд орох эрсдэлтэй юм байна. Тиймээс багш нар гэлтгүй сурагч хүүхдүүд маань ч гэсэн эрүүл мэнддээ анхаарах хэрэгтэй. Эцэг эхчүүд маань хүүхдүүддээ анхаарал хандуулаасай гэж хэлэх байна. Багш нарын хувьд, хэчнээн завгүй ч гэсэн өөрийн ур чадвараа сайжруулахын тулд заах арга зүйн сургалт, компьютерийн программын ахисан  түвшний сургалт, интеграци хичээл боловсруулах аргазүйн сургалтад хамрагдаж, илүү ихийг сурч мэдэх гээд хичээж байна. Мөн телехичээл зааж буй мэргэжлийн багш нараас туршлага судлан тэмдэглэл хөтөлж, туршилт судалгааны хичээлийг цахим орчинд хэрхэн удирдан чиглүүлэн хөтөлж заах талаар бусад мэргэжлийн багш нараасаа туршлага судалж байна.

- Таныг онлайн хичээлээс гадна хүүхдүүдтэй хамтран ажиллах, хүүхдийн сэтгэлзүйд хүрч ажиллах тал дээр илүү их туршлагатай гэж сонссон. Цар тахлын үед гэрээсээ хичээллэж буй хүүхдүүдэд ямар ажлуудыг зохион байгуулж байгаа вэ?

-Миний хувьд БШУЯ-ны дэргэдэх хэрэгжүүлэгчийн багт ажиллаж байсан бөгөөд нийслэл хөдөө орон нутагт багш нарт зориулсан сургалтуудыг хийж, багш нараа заах арга зүйгээр ханган  зөвлөгөө өгч ирсэн ажлын туршлагатай.  Цаашид илүү ихийг сурч мэдэхсэн гэж хичээж суралцсаар байна. Одоо мэргэжлийн багш нартай хамтран интеграци хичээл боловсруулан танхимд сургалт зохион байгуулах, бусдад түгээн дэлгэрүүлэх ажлаар хамтран ажиллахаар хичээлийг төлөвлөн боловсруулах шатандаа үр дүнтэйгээр саналаа солилцон ажиллаж байна. Мөн зарим багш нартайгаа хамтран ангийнхаа сурагчдыг хөгжүүлэх, тэднийг ном унших дадалтай болгох, уншсан номын тэмдэглэл хөтлүүлэх, зохиолын үйл явдлаас сэдэвлэн жүжигчилсэн тоглолт хийх зэргээр сурагчдыг баг хамт олноороо ажиллах хамтран хичээллэх арга барил эзэмшүүлэх, нийгэмшүүлэхэд хамтран хийх ажлууд их байгаа.

-Цаашид боловсролын байгууллагууд танхимын болон онлайн хосолсон сургалтын хэлбэрт шилжих нь зүйтэй гэж бодож байна уу?

-Боловсролын байгууллагууд цаашид танхимын болон онлайн хосолсон сургалтын хэлбэрт шилжих нь зүйтэй гэж боддог. Учир нь танхимын сургалтын хамгийн том давуу тал нь багш сурагчдын харилцаа шууд хамааралтай. Танхимын сургалтаар сурагчид багшаас ойлгоогүй үлдсэн мэдлэгээ тэр дор нь асууж лавлах, харилцан ярилцах, багт хувааж хоорондоо асуудлыг хэлэлцүүлэх, мэтгэлцээн зохион байгуулах гэх мэт олон давуу талтай байдаг. Харин цахим сургалтын үед энэ байдал учир дутагдалтай. Яагаад гэвэл богино хугацаанд сургалтыг төлөвлөж шинжлэх ухааны мэдлэгийг хүргэх шаардлагатай байдаг учраас харилцан ярилцах асууж тодруулах хугацаа бага гардаг. Мөн цахим сургалтын үед сурагчдын анхаарал төвлөрөлт сайн биш байдаг. Зарим сурагч камераа хаачихаад хичээлд дуугарахгүй багш дуудаад байхад огт оролцохгүй идэвх оролцоо тааруу байна.  Танхимын сургалтын үед харин анхаарлыг төвлөрүүлж хичээлээ заах бүрэн боломжтой.  Харин цахим сургалтын хувьд багш, сурагч аль аль нь цахим орчинд маш сайн хөгжих боломжтой.  Ялангуяа багш нар өөрийгөө хөгжүүлэх, бусдаас суралцах, бусдад туршлагаа түгээн дэлгэрүүлэх, заах арга зүй, бүтээлч хандлагыг нэмэгдүүлэх бүрэн боломжтой байдгаараа давуу талтай юм байна гэж харж байгаа. Тиймээс хосолсон сургалтын системд шилжих нь зүйтэй байх.

Эх сурвалж: “Зууны мэдээ” сонин

2021.3.31 ЛХАГВА № 64 (6541)