Д.АРИУН

Жирийн л нэг футболк, өргөн өмд, харин дээр нь банзал… Энэ бол Холливудын жүжигчин, Оскарын шагналын эзэн Жаред Летогийн Лос-Анжелесийн гудамжинд  папарацци дуранд өртсөн зураг. Тэр энэ гоёлоо улаан хивсний ёслол дээр ч бас донжийг нь тааруулан өмсөж бусдаасаа содон харагдахаа ч мартаагүй бололтой.  “iHeartRadio Music Awards”-ийн үеэр түүний өмссөн нарийнхан өмд, хурц өнгөтэй жакет хоёроос нь илүүтэйгээр “мини юбки”-н дээр нь хүмүүсийн нүд тусаж байсан нь мэдээж.

Ингэж эмэгтэйчүүдийн гоёлыг өөрийн болгон бусдаас ялгарч байгаа цорын ганц эр хүн нь Жаред Лето биш. Рэппэр Канье Уэст өнгөрсөн жил тоглолтынхоо үеэр хар өнгийн арьсан “мини”-тэй тайзнаа гарч ирж байсан бөгөөд түүний энэ гоёл нь “Givenchy”-гийнх байлаа. Тэгэхээр дизайнерууд хийгээд хувцас загварын брэндүүд ч гэсэн энэ чиглэл рүү анхаарч эхэлсэн гэсэн үг юм. Алдарт Марк Жейкобс эрчүүд заавал өмдөн дээр биш дангаар нь өмсөж болно гэж үзэж, өөрөө  үлгэрлэн янз бүрээр өмсдөг нэгэн аж. 

Ханхүү Чарльз, алдарт жүжигчин Шон Коннер  гэх мэтчилэн олон алдартнуудын шотланд банзалтай зураг хэвлэлийн хуудсыг чимэж байсан хэдий ч өнөөгийнх шиг ингэж хэрэглээ талаасаа эрчимтэй гарч ирж байгаагүй гэнэ. Эрчүүд ийм гоёлтой байх нь танд таалагдаж байна уу?

Эх сурвалж: www.polit.mn