Т.САЙХАН

2021.02.01

ЭМЯ-наас COVID-19 нөхцөл байдлыг танилцууллаа. Сүүлийн 24 цагт улсын хэмжээнд 5433  хүнд шинжилгээ хийхэд 35  хүний сорьцод илэрсэн байна. Шинээр илэрсэн тохиолдлууд нь бүгд Улаанбаатар хотод бүртгэгдсэн байна. 

ХӨСҮТ-ийн Тандалт судалгааны албаны дарга А.Амбасэлмаа "Сүүлийн хоёр долоо хоногт худалдаа үйлчилгээг нээсэн тул халдвар эрс нэмэгдэж байна. Монгол Улсад халдварын тохиолдол болон голомтууд нэмэгдсээр байна. Сүүлийн долоо хоногт 126 тохиолдол илэрсэн нь өмнөх 4 долоо хоногтой харьцуулахад 30 хувиар өссөн үзүүлэлт юм. Өчигдөр байгууллагууд болон салбар хоорондын эрсдэлийн үнэлгээг хийхэд нийслэлийн хэмжээний тархалт гарах өндөр эрсдэлтэй байна гэсэн дүн гарсан. Бид халдварын 30 орчим голомтыг бүртгэж 14,15-ыг хязгаарлаж, хяналтдаа авсан ч дахин 10 гаруй голомт идэвхтэй байна. Нийслэлд халдвар нэмэгдээд байвал бусад эмнэлгийн үйлчилгээнд ч хүндрэл учирна. Сүүлийн үед 65-аас дээш насны иргэд халдвар тусаж, хүндрээд ирж байна" гэв.  Мөн өчигдөр Улаанбаатар хотоос Сэлэнгэ аймгийн уурхайд ажиллахаар явсан  нэг иргэнээс халдвар илэрсэн. Тус иргэнийг Улаанбаатарт авчирч, эмчилнэ. Сэлэнгэд халдвар гарсан гэж үзэхгүй гэв. 

Ингэснээр Улаанбаатар хотын хэмжээнд кластер халдварын тоо 980 боллоо. Аймгуудад сүүлийн 24 цагийн хугацаанд халдвар илрээгүй. Улсын хэмжээнд кластер өвчлөлийн тоо 1306 боллоо.  Сүүлийн 24 цагийн хугацаанд 35 хүн эдгэрч, эмнэлгээс гарсан байна. Улсын хэмжээнд нийт батлагдсан тохиолдол 1814  байна. Үүнээс 1358 буюу 75 хувь нь эдгэрсэн байна. Одоо нийт 443 тохиолдол эмнэлэгт хэвтэн эмчлүүлж байгаас биеийн байдал маш хүнд нэг, хүндэвтэр 67, хөнгөн 375 эмчлүүлж байна гэж ХӨСҮТ-өөс мэдээллээ. 

Эх сурвалж:www.polit.mn