М.ХҮСЛЭН

Өчигдөр өглөөний 07.50 цагт БНХАУ-ын Шинжаан-Уйгарын өөртөө засах орны нийслэл Үрэмчи хотод халдлага болж 31 хүн амь үрэгджээ. Түүнчлэн 90 гаруй хүн гэмтэж бэртсэн байна. Хятадын “Синхуа” агентлагийн мэдээлснээр хоёр автомашин хүн ихтэй хүнсний зах руу цөмөрч орсны дараа цонхоороо тэсрэх бөмбөг шидсэн байна. Хүмүүс рүү шидсэн тэсрэх бөмбөгний нэг нь дэлбэрчээ. Харин орон нутгийн гэрчүүдийн мэдээлснээр зах дээр олон удаа дэлбэрэлт болох чимээ гарсан гэнэ.     

Хятадын албаныхны зүгээс энэ хэрэгт исламын шашинт уйгур үндэстний салан тусгаарлагчдыг буруутгаж байна. Байгалийн баялаг ихтэй, уйгур үндэстэн голлон амьдардаг БНХАУ-ын баруун хэсэг болох Шинжаан-Уйгурын өөртөө засах оронд сүүлийн үед хүчирхийлэл, зэвсэгт халдлага ихээр гардаг болсон. Бээжингийн засаг захиргаа “Исламын хэт даврагчид болон гадаадынхны дэмжлэгийг авдаг Уйгурын салан тусгаарлагчдын аюул заналхийлж буйг” шалтаг болгож тус бүс нутагт аюулгүй байдлыг чангатгаад байгаа. Гэвч гадаадын зарим нэг шинжээчид Бээжингийн зүгээс явуулж буй хатуу бодлогыг буруутгаж шүүмжилж байна. Хүний эрхийг хамгаалагчид “Эдийн засгийн тэгш бус байдал, уйгур үндэстнүүдийн эсрэг явуулж буй хатуу бодлого хүчирхийллийн гол шалтгаан” хэмээн үздэг аж.  

Энэ сарын эхээр Үрэмчи хотын төмөр замын буудлын хаалганы дэргэд тэсрэх бөмбөг дэлбэрч гурван хүн амь үрэгдэж, 79 хүн гэмтэж шархадсан халдлага гарсан билээ. Мөн өнгөрсөн оны аравдугаар сард Хятадын нийслэл Бээжин хотын төв Тян Ань Миний талбайд автомашинтай этгээдүүд осолдож, дэлбэрсэн халдлага гарч, эрх баригчдыг сандаргасан юм. Үүнээс хойш Хятадын хэд хэдэн мужид ирт мэсээр зэвсэглэсэн болон тэсрэх бөмбөг бүхий халдлагууд тасралтгүй гарсаар байна.