Т.САЙХАН
УИХ-ын чуулганаар Шүүгчийн багц хуулийг хэлэлцэж эхэллээ. Хуулийн төслийг ажлын хэсгийн ахлагч УИХ-ын гишүүн Б.Энхбаяр танилцуулав. Энэ үеэр УИХ-ын гишүүн С.Ганбаатар эрх баригчид дураар авирлаж, Ерөнхийлөгчийн бараг бүх эрхийг булаан авч буйг дурдав.
УИХ-ын гишүүн Б.Энхбаяр: -Өнгөрсөн хугацаанд 17 шүүгчийн бүрэн эрхийг түдгэлзүүлж шалгаад, найм нь гэм буруугүй нь тогтоогдож, Улсын дээд шүүхийн хоёр шүүгчийн бүрэн эрх сэргэсэн. Шударга бусын хонгилыг нураах амаргүй. Шүүгчийг томилох, хуульчдаас шүүгчийг томилох, шүүгчдэд хариуцлага тооцдог асуудал нэг хүн нэг даргаас хамаарах ёсгүй. Хязгааргүй эрх мэдэл хязгааргүй дарангуйллыг бий болгодог. Ойрын өдрүүдэд Шүүхийн багц хуулиуд хэлэлцэгдээд ирэхээр тодорхой асуудлууд хэлэлцэгдэнэ. Хамгийн сайн, шилэгдмэл нь шүүгч болдог байх тухай хэлэлцэгдэж байгаа.
УИХ-ын гишүүн Ш.Адъшаа: -Энэ хуулийг дэмжихгүй байгаа. Эрдэнэтийн хувь, С.Зоригийн хэргийг хаах юм уу. Маш хурдавчилсан горимоор ҮАБЗ-ийн шийдвэрээр оруулж ирсэн хууль хүчний байгууллагынхныг томилох тухай хуулийг өөрчлөх асуудал орж ирлээ.
УИХ-ын гишүүн Б.Энхбаяр: -Энэ хуулийн төсөл тодорхой хэрэг, тодорхой хүнтэй холбоотой асуудал биш ээ. Энэ хуулийн төслийг баталж байхад би тодорхой албан тушаал хашиж байгаагүй. Баталж байхад ч би үзэл бодлоо илэрхийлээд явж байсан. УИХ-ын дээр нэг л зүйл бий. Тэр нь Үндсэн хууль. Энэ хуулийн төслийг дэмжихгүй гээд та хонгилыг хэвээр байлгахыг хүсч байгаа юм уу? Та хонгилоор орж, гараад л яваад байсан түүхтэй хүн байна лээ шүү дээ.
Ингээд Шүүхийн багц хуулийг анхны хэлэлцүүлэгт бэлтгүүлэхээр байнгын хороонд шилжүүлэв.
Эх сурвалж:www.polit.mn