Т.САЙХАН

УИХ-ын Төсвийн байнгын хороо өнөөдөр /12.25/ хуралдлаа. Хуралдаанаар  COVID-19-ийн халдварын цар тахлын үед татвар, нийгмийн даатгалын шимтгэл, халамжийн чиглэлээр Засгийн газраас авч хэрэгжүүлж буй арга хэмжээ, түүний үр дүнгийн талаар мэдээлэл сонсов.

Иргэдэд 2020 онд үзүүлсэн халамж, татвар, нийгмийн даатгалын шимтгэлийн хөнгөлөлт, чөлөөлөлтийн хэмжээ хоёр их наяд 375 тэрбум төгрөгт хүрчээ. Энэхүү дэмжлэгийн нийт хэмжээ нь төрийн 198 мянган албан хаагчдын 1.6 жилийн цалин, эсхүл аж ахуйн нэгжийн 156 мянган ажилтны бүтэн жилийн цалингийн сантай тэнцэхээр байгаа гэнэ. 

Энэ хугацаанд хувийн хэвшилд ажиллаж байгаа 989 мянган ажилтан цалингийн орлогодоо суутгуулах байсан 198 тэрбум төгрөгийн татварыг, 570 гаруй мянган даатгуулагч иргэн НДШ-д төлөх байсан 566.8 тэрбум төгрөгийн шимтгэлийг тус тус өөртөө авч үлдсэн байна. Ингэснээр нэг ажилтан сард дунджаар 241 мянган төгрөг, зургаан сарын хугацаанд нийт 1446 мянган төгрөгийг татвар, нийгмийн даатгалын байгууллагад төлөх байснаас чөлөөлөгдсөн байна.

Эх сурвалж:www.polit.mn