Б.ДОЛЖИНЖАВ

Их Британи улсад коронавирусын шинэ төрлийн вирус тархаж, эх үүсвэрийг тогтоохоор судалж байгаа талаар бид өмнө нь мэдээлсэн. Вирусын эх үүсвэрийг илрүүлэхийн тулд Дэлхийн эрүүл мэндийн байгууллага, Британийн эрх баригчидтай хамтран ажиллаж байгаа юм.Энэ шинэ хувилбарын вирус тус улсад хурдацтай тархаж байгаагаас хөл хориогоо чангаруулж байгаагаа Ерөнхий сайд Борис Жонсон мэдэгдлээ. Тус улсын дөрвөн мужид ажилдаа явахаас бусад тохиолдолд гэрээс гарахгүй, олон нийтийн газар нэгээс олон хүнтэй уулзахыг хориглолоо. Энэ хориг хоёр долоо хоногийн турш үргэлжилнэ.

Энэ талаар Ерөнхий сайд Борис Жонсон “Хөл хориог чангаруулсан мэдээ сайхан санагдахгүй ч үүнээс өөр сонголт байсангүй. Вирус хэлбэрээ өөрчилж байхад бид ч тэмцэх арга барилаа өөрчлөх ёстой. Вакцин гарсан учир Улаан өндөгний баяр гэхэд бүх зүйл өөрчлөгдөнө. Тиймээс Зул сарын баярын өдрүүдээр муж хооронд аялж, нэг нэгнийдээ зочлохгүй байх шаардлагатай. Вирусын шинэ хувилбар нь өмнөхөөсөө 70 хувийн хурдацтай тархаж магадгүй” гэж ярилаа.

Эрдэмтэн, судлаачид ч вирус мутацид орж, нөхцөл байдал муудах төлөвтэй ч вакцинд найдаж байгаа хэмээн мэдэгджээ. Тус улс хоёр долоо хоногийн хугацаанд 350 мянган хүнийг цар тахлын эсрэг “Pfizer” вакцинд хамруулжээ. Ирэх долоо хоногт Оксфордын их сургуулийн туршиж байгаа хоёр дахь вакцинд зөвшөөрөл олгох талаар хэлэлцэх аж. Зөвшөөрөл олговол хоёр долоо хоногт хоёр сая хүн вакцинд хамрагдах боломжтой юм.

Эх сурвалж:BBC