Т.САЙХАН

Түр хорооны хурал үргэлжилж байна.  Энэ үеэр УИХ-ын гишүүн Д.Дэлгэрсайхан эдийн засагт авч хэрэгжүүлж арга хэмжээний талаар   Монголбанкны удирдлагуудаас асуулт асууж байр сууриа илэрхийлэв.  Тэрээр "Ипотекийн зээлийг хойшлуулж байгаа нь сайн хэрэг.  Бусад зээлийн асуудал дээр  хугацааг хойшлуулсан ч хүү нэхээд байгааг ойлгохгүй байна.  Банкинд хувь хүнд хаа хаанаа хэцүү байгааг ойлгож байна. Хонь ч хөөрхий, чоно нь ч хөөрхий. Тэгэхээр онцгой цаг үе гэж үзээд хадгаламжийн хүүг зогсоовол яадаг юм бэ.  Хадгаламж эзэмшигчдийн 20-30 хувь нь бараг тэрбум төгрөгийн хадгаламжтай гэж байна. Тэгэхээр өртөг бүрдүүлж буй зээлийн хүү буурна. Зээлийн хүү буурахаар аж ахуй нэгжид хөнгөн тусна.  Аж ахуй нэгжүүдийн үйл ажиллагаа таг зогсох гээд байгаад ач холбогдол өгч ажиллаач ээ.  Мөн арилжааны банкиуд зээл авахад  Монгол банкнаас эрх зүйн ямар дэмжлэг үзүүлж байна вэ. Засгийн газар бүх юмыг даах боломж байхгүй. Тийм учраас зээлийн хүүг бууруулах ганц боломж нь хадгаламжийг хүүгүй болгох. Гадаадын оронд мөнгөө хадгалуулахын төлөө банкинд шимтгэл төлдөг. Гэтэл манайд эсрэгээрээ банк нь оршин тогтнохын тулд хүү амлаад буй нь буруу " гэхэд 

Монголбанкны дэд Ерөнхийлөгч Г.Дөлгөөн " Хадгаламжийн хүүг тэглэхтэй холбоотой хууль гаргаад хэрэгжүүлэх боломжтой. Гэхдээ Монголбанк хадгаламжийн хүүг зогсоо гэх эрх зүйн боломж байхгүй. Энэ нь санхүүгийн зээл зээлийн 95 хувийг бүрдүүлж байгаа банкны системээ татаад унагах вий гэсэн  болгоомжлол байгаа.    Хадгаламж эзэмшигчдийн тухайд нэг тэрбум төгрөгөөс дээш хадгаламжтай нь нийт хадгаламж эзэмшигчдийн 20-30%-ийг эзэлж байна. Үүнд ААН-үүдийн хадгаламж жин дарж байгаа. Дундаж давхаргын иргэдийн хувьд хадгаламжийн хэмжээ нэлээд өссөн байна. 10-100 сая төгрөгийн хадгаламжтай байна. Тиймээс хадгаламжийн хүүг тэглэх нь массыг хамарсан асуудал болох болов уу" гэлээ. 

Эх сурвалж:www.polit.mn