Ч.ЗОТОЛ

Хөгжлийн хөтөлбөр намаас энэ удаагийн орон нутгийн сонгуульд оролцохгүй. Учир нь том намууд Монголд сонгуулийн буруу жишиг тогтоосон. Иймд   нийгмийн оюун санааг зөв болгох, соён гэгээрүүлэх, ялангуяа залуусыг  зөв төлөвшүүлэх шаардлага тулгарч буй тул цаашид  энэ чиглэлээр  ажиллана. Нийгэм зөв болсон цагт сонгуульд оролцох асуудлыг эргэж ярина  гэж мэдэгдлээ. Хэвлэлийн хуралд Хөгжлийн хөтөлбөр намын дарга О.Заяа, Ерөнхий нарийн бичгийн дарга Д.Хишигдэлгэр, Ч.Батдэлгэр, Хан-үүл дуургийн намын хорооны  дарга н.Мөнх-Ариун, Баянзүрх дүүргийн намын хорооны Ч.Батдэлгэр нар оролцсон юм.

Тус намын дарга О.Заяа хэлэхдээ “Манай намын суурь 1992 онд тавигдсан Залуучуудын намаас угшилтай. 2007 онд Хөгжлийн хөтөлбөр нам гэж нэрээ сольсон. Тухайн үед залуусын нам, хөгшчүүлийн нам, эмэгтэйчүүдийн нам гэж олон нам гарах нь гэсэн нийгмийн уур амьсгал байснаас үүдэлтэй. Бид энэ нэрийг сонгож авахдаа  улс төрийн намууд Монгол Улсаа хөгжүүлэх хтөөлбөргүй, тодорхой  бодлогогүй явж байна гэдэгт шүүмжлэлтэй хандсан. Энэ үүднээс  оюуны шинжилгээ, судалгаанд түшиглэсэн эрдэмтдийн баг байгуулан судалгаа явуулж хөгжлийн томоохон хөтөлбөр боловсруулах зорилт тавьсан. Энэ хөтөлбөрөө 2008 гэхэд эхийг нь гаргаж, 2012 оны сонгуулиар дэвшүүлсэн. Үүнээс хойш хөтөлбөрөө  ард түмэндээ танилцуулахад идэвхтэй ажиллаж ирсэн.

Манай нам 20 гаруй мянган гишүүнтэй, хатуу гишүүнчлэлгүй. Бодлого боловсруулдаг, анхан шатанд нэгжүүдтэй. Бид 2012 оноос 4-5 удаагийн сонгуульд орохдоо нэг удаа эвсэл болж, бусдад нь дангаар оролцсон. Сонгуулийн бүх процесст дүгнэлт хийж судалгаа гаргахад Монгол Улсын хэмжээнд дөрөв дөрвөн жилээр зохион байгуулагдаж байгаа ээлжит  сонгууль  буруу технологиор явьж ирлээ. Ард түмнээ төөрөгдүүлж, эдийн засгийн барьцаанд авч, хэсэг, хороо хорины дарга нараар дамжуулан хайрцагладаг тавилттай жүжиг явагдаж байна гэсэн дүгнэлтэд хүрлээ. Энэ удаагийн Орон нутгийн сонгуульд манай нам дангаараа оролцохоор бүх дүүрэг, аймагт нэр дэвшүүлээд байсан. Гэтэл Бага хурлаар хэлэлцэхэд өөр шийдвэр гарлаа. Сонгууль үнэнч шударга, ард түмэн, улс орны  төлөө  гэсэн хүмүүсээ сонгож чаддаггүй. Эртнээс бэлдсэн, зөвхөн сонгуулийн төлөө зорилт тавьдаг, түүнд бүх зүйлээ чиглүүлдэг, ард түмний санаа сэтгэлийг худалдаж авч, хуурч мэхэлж санал авдаг тогтолцоо бүрдсэн учраас Орон нутгийн  сонгуульд оролцохгүй гэж манай намын гишүүд үзлээ. Тиймээс цаашид нийгмийн хандлагыг өөрчлөх, хүмүүсийн оюун санаанд хувсьгал хийх, ялангуяа залуусыг  зөв төлөвшүүлж байж улс төрийн сонгуульд оролцох шийдэлд хүрлээ” гэсэн юм.

Эх сурвалж: www.polit.mn